自從嫁作人妻，童愛玲都好耐冇響幕前演出，不過佢最近技癢，孖住錢小豪幫港台拍劇。老公王敦民係生意人，童愛玲復出純粹賺錢買花戴，不過佢十歲嘅囝囝Kyle王子毅就唔係咁睇，投訴媽咪開夜班早出晚歸，冇時間陪佢。
兩母子感情好，見少一面都投訴，不過凡事總有例外。早個禮拜《壹》仔見到童愛玲同囝囝企響時代廣場後面嘅避車處等車，兩母子傾唔夠兩句，一直繑埋雙手嘅童愛玲，突然好勞氣，手指指指住Kyle，連珠炮發當街鬧仔。
平日童愛玲說話陰聲細氣，估唔到鬧仔咁好火，不過更估唔到，就係無論俾媽咪點鬧，Kyle都冇駁嘴，只係露出一對被寃枉嘅眼神。呢個年代，港孩個個一言九「頂」，童愛玲果然教子有方！
俾個仔激親，童愛玲失控係咁鬧，囝囝當堂扁曬嘴。
見司機車到，童愛玲即刻一支箭行上車，Kyle噸位有番咁上下，搞到俾媽咪拋離幾個身位。
