原本大鑼大鼓話會全裸演出經典百老匯名劇《EQUUS馬》嘅張敬軒，最終因尺度問題，觀眾無眼福欣賞軒仔全相，但佢同谷晒不倒胸、內衣上陣嘅方皓玟喺馬房嘅纏綿戲，都足以睇到大家嘩嘩聲。
上個禮拜五（五月九日）首場，有份投資嘅劉德華老闆，都有現身支持。舞台劇主力由詹sir詹瑞文前妻甄詠蓓主理，一做二十一場，加埋黃秋生助陣，就算軒仔冇全裸，號召力勝過詹sir加梁洛施只做六場嘅舞台劇《快樂勿語》。
不過，為咗谷劇，梁洛施的確好幫手！今時今日仲講當年生大仔李長治，由李澤楷親手剪臍帶係佢人生最快樂一刻，舊事重提，都係想去多啲飛啫！
講好全裸唔兌現，但軒仔同方皓玟嘅內衣褲纏綿戲，都令觀眾大開眼界。
劉華有份開水喉投資《EQUUS馬》，首場完騷，劉華以老闆身份入後台同演員影大合照。
甄詠蓓（右二）有劉華秋生力撐，詹sir就有梁洛施自爆同李澤楷舊戀情硬谷，過氣夫妻拗手瓜，女方略勝一籌。
距離舞台劇公演日期只剩得大半個月，上個禮拜五（五月九日）詹sir專登抽時間陪女友Amanda再加多個朋友，到又一城開餐。
撰文︰八珍
