見到鏡頭，鄭多燕即刻放低杯雪糕，之後睇住班dancers大啖大啖食。
專誠飛嚟香港舉行一連兩場《萬人熱辣Show》嘅韓國塑身天后鄭多燕，以為食住年中無休嘅減肥熱潮，實食冇黐牙！點知只係賣出三成飛，大會估計埋單要蝕二百萬。
票房慘淡，但毋損鄭多燕心情。上個禮拜四（五月八日），開騷前一日，鄭多燕同成班工作人員行ifc，見到有意大利Yo Mama乳酪雪糕，即食。
食食吓，鄭多燕發現有鏡頭對住自己，即刻九秒九放低杯雪糕唔敢再食。事後鄭多燕亦承認怕俾傳媒影到食相，又話當自己受唔住美食誘惑時，會不斷做運動，總之就講咗一大堆理由，力保「塑身天后」招牌。食杯雪糕都咁大反應，如果影到鄭多燕去深井食燒鵝，肯定要開記者會，公開謝罪！
食到成支羮塞入口，鄭多燕食相豪邁。
食雪糕斷正，事後鄭多燕努力在鏡頭前擺出優雅甫士影相，哦……咁都算優雅？
遇見fans，鄭多燕熱情攬實合照。
有份投資《萬人熱辣Show》嘅林建名（右二）同孫敬安（左），原本諗住兩場騷有一萬人入場，點知最終只係賣出三千張門票。
