早幾日媽咪姐同孫敬安飲開茶，佢話嚟緊五月會幫鄭多燕喺會展搞個《萬人熱辣SHOW》！仲話呢個其實係黎瑞恩嘅idea，「上年幫黎瑞恩搞演唱會，有日佢話不如搵鄭多燕嚟搞個騷，我當時都唔知邊個係鄭多燕？佢叫我上網睇，話依家好多女仔都睇佢啲片跳舞減肥，有百幾萬個點擊率，仲話佢自己喺屋企都有跟住跳。」結果孫敬安睇完片，又同老婆盧敏儀喺屋企一齊跟住試跳，覺得真係有料到！「嗱嗱聲」就搵鄭多燕嚟開騷。
不過，個騷成兩個「磚頭」咁長，媽咪姐擔心跳到嘔白泡喎！但呢個跳舞騷嘅監製錢國偉就同媽咪姐講定啲嚟，「梗係唔係跳足兩個鐘啦！中間會有表演同玩遊戲。」佢仲話呢啲咁筍嘅嘢，梗係益自己友，於是call埋好似阮兆祥、小寶同蝦頭呢啲「有需要人士」做特別嘉賓，等佢哋收住錢操肌，爽喎！
錢國偉搵嚟阮兆祥、小寶同蝦頭組成「至Fit三人組」，講到明操fit佢哋，益自己人！
三百六十度旋轉舞台，再加條天橋，方便觀眾睇得清楚鄭多燕舞姿，到時仲全場冇櫈，一律鋪蓆。跳唔郁？瞓喺度睇騷都得！
上年孫敬安同太太盧敏儀幫黎瑞恩搞慈善演唱會，之後小恩子就提議搵「韓國塑身女王」鄭多燕嚟香港開騷。
同場加映
韓風吹唔停！媽咪姐等住跟鄭多燕跳萬人操之時，上星期就先去睇人氣女團2NE1嘅演唱會。嘩！你睇佢哋扭晒腰，跳到頭髮飛起，幾咁熱血，好想跟住跳呢！
