現年35歲、01年港姐冠軍楊思琦在無綫13年，性格不懂埋堆、不懂拍高層馬屁的她，一直未受公司重用，再加上年前與李泳豪、吳帥的三角戀情，傳公司對她有意見，自此遭受冷待，幾年來不斷向公司要求拍劇，但公司置若罔聞，在心灰意冷情況下，最近約滿無綫，公司雖然願意與她續約，但條件未如理想，經深思熟慮後，為囡囡她寧願選擇冒險向外闖，期望殺出新天地。
最近已正式回復自由身的楊思琦，已經沒有無綫的大靠山，又沒有經理人的她，在前路茫茫下，今後要自力更生努力賺錢撫養女兒成長。思琦昨日接受本報專訪，直認與無綫正式結束賓主關係，對於外傳無綫提出苛刻的續約條件，大幅減人工兼被踢出經理人部，為此，思琦說：「今次決定走，同人工無關，事實上唔係好似外傳嘅報道咁苛刻，反而有加人工畀我，只係大家喺拍劇方面未得到共識，所以先有咁嘅決定。」
思琦日前到內地為婚宴做表演嘉賓。微博圖片
楊思琦對上一套劇已是10年的《鐵馬尋橋》，因而令她下決心外闖。劇照
01年港姐冠軍出身的楊思琦經過一番掙扎，終決定離巢外闖。
唔想望番轉頭
思琦自言一直有向公司反映拍劇意願，卻未受重視，她說：「佢哋話會盡量安排，我覺得好幾年冇拍劇集機會，只係做啲綜藝科嘅節目，始終春青有限，我諗𠵱家再試新嘢，都係一個適合嘅時間。」會否對無綫覺得失望？她說：「做人應該向前看，唔需要睇番轉頭，講番以前，我相信明天會更好。」
近年有不少無綫藝人離巢外闖，除了因為人工低之外也與欠缺發展機會有關，思琦是否受逃亡潮影響？她說：「每個人都係一個獨立嘅個體，未必係睇大眾嘅方向，而係睇自己需唔需要。只不過喺呢個時間，我揀咗嘗試另一個方向，去學啲新嘅嘢，充實吓自己。」
現時獨力照顧兩歲多囡囡楊卓穎的思琦，一度為續約問題掙扎，她說：「去到差唔多續約嗰陣，你就會喺度諗自己嘅路向，呢個決定好似人生交叉點，一個魔鬼，一個天使，究竟我聽邊個說話好呢？但係當你諗到個決定，就會好relax，知道自己點樣行。」她坦承當時有不少朋友覺得大樹好遮蔭，不續約是很冒險的一件事，但思琦說：「都有人support我，我相信肯做、肯努力，去到邊度都係一樣，自己再進取啲，爭取多啲唔同嘅工作。」她續說：「我喺公司13年，學咗一段時間嘅嘢，想去進修吓，或者去唔同嘅地方拍吓嘢，同人哋再學啲新嘢，你問我係咪冒險，都可能係一個挑戰，有危就有機，呢個係一個機會。」
楊思琦與媽媽有共識，媽媽將主力照顧囡囡。微博圖片
返內地尋機會
談到未來的去向，思琦稱暫時不用擔心，現階段有不少工作正籌備中，當中亦包括好幾間經理人公司傾談中，她還說：「我𠵱家想試多啲新嘢，首要係想拍劇，所以我會去內地睇吓有冇乜嘢劇可以拍，我相信開放自己，機會就會嚟。」家庭方面，思琦亦早已有安排：「我同媽咪有共識，𠵱家小朋友會由媽咪照顧，科技咁發達，電話都可以傾到偈，知道小朋友發生緊乜嘢事。」
採訪：鍾國仁、何慧斯
攝影：葉君海、周樂恒
From:
http://hk.apple.nextmedia ... 140515/18720348
