【錫媽媽】
楊思琦日前帶女兒卓穎買新書包，開心得要錫媽媽一啖。攝影：仇志德
單親媽媽楊思琦的女兒楊卓穎已經3歲，聰敏的卓穎成功考入心儀的幼稚園德望小學暨幼稚園，跟劉德華千金劉向蕙做同學。卓穎下周開學了，楊思琦心情既緊張又興奮，她早在一個月前已為囡囡卓穎準備開學日用品，日前她帶女兒到鞋店選購白皮鞋，卓穎買到心儀的書包，即刻向媽媽獻吻。思琦回想3年前未婚產女，今日為愛女做牛做馬都無怨無悔，還甜絲絲說：「雖然好攰！好多開心！」
楊思琦2011年戀上香港跳水隊前成員吳帥，撇甩拍拖九年的李泳豪，後來發現錯愛吳帥而分手，思琦決定獨自承擔，一個人撫養與吳帥的女兒長大成人，因此女兒跟隨母親姓楊，名卓穎，英文名Krystal。楊卓穎在美國出世，出生後隨母親楊思琦回港定居，由婆婆和公公合力照顧，光陰似箭，卓穎轉眼3歲，日前楊思琦接受本報專訪，她說：「眨眼K1，時間過得好快，忙緊工作同時照顧佢覺得好充實，是但冇一樣精神寄託都好悶，𠵱家365日都好忙，努力做嘢賺嚇錢，佢畀我呢個動力。」
【唱歌仔】
楊思琦的3歲女兒楊卓穎，即場唱《Let It Go》，
【好精靈】
卓穎歲半時，因肚裡有泡膿要開刀做手術元氣大傷，所以身形較瘦。
【試新鞋】
思琦帶愛女選購白皮鞋返學，卓穎乖乖抬高腳仔試鞋。
「有好多驚喜畀你」
卓穎升讀K1，百忙中的思琦亦做好心理準備配合女兒的功課，她說：「開學佢又應該功課忙啲，睇嚇點樣跟嚇佢啲功課，小朋友好快學好多嘢，如果佢唔明要溫習都要靠媽媽。」不過思琦認為最緊要是教導女兒有禮貌和開心，做自己喜歡做的事，享受讀書和學習的樂趣，她已經心滿意足。
當日下定決心要做單親媽媽，楊思琦並不是一時衝動，女兒帶給她無窮的生命力和一個驚喜又一個驚喜，她笑說：「好多開心嘢！對住個小朋友由朝到晚都有好多驚喜畀你，一起身就喊，大叫喇！𠱁起人上嚟就會心微笑，突然間又攬住你：『媽媽，I LOVE U。』都好sweet，做嘢返到屋企雖然好攰，但係佢對住我笑，開門口歡迎我都好開心，乜嘢攰都唔記得曬，佢都有等我返屋企㗎，佢玩完冇乜嘢做，無聊就會諗起媽媽囉！」思琦又哈哈大笑說：「佢個個都錫，佢記得曬成屋人嘅名，中英文名都講，突然間叫我楊思琦，因為佢聽到婆婆嗌琦琦，佢就跟人咁嗌，真係有好多歡樂。」
2011年思琦戀上吳帥（左），惜最後分手，她獨力照顧女兒。資料圖片
楊思琦在美國誕下女兒，之後帶女回港定居。
痛心女兒患病捱刀
卓穎身形瘦小，但是活潑可愛，在她歲半時候，被驗出患皰疹一型，大病一場，楊思琦擔心不已，她說：「唔知點解會突然個肚裡面成泡膿，開咗一大刀，嗰陣時好擔心，醫生話好少案例，尤其係咁細個小朋友身上發現，好罕有。」
卓穎捱了一刀，思琦方寸大亂，幸好有婆婆悉心照顧，思琦說：「要小心照顧，其實希望佢食多啲嘢，食得慢，佢又唔係好吸收，歲半要學行又比較遲，學緊又突然有病要做手術，做完唔識行好擔心，好似唔記得點行，咁遲先學行就好擔心好擔心，喺一歲十個月先行，有啲一歲已經識跑，等佢𠵱家大個啲做適量運動，身體好番啲，等佢吸收啲，開刀都係有啲影響，比較瘦，會帶佢去調理嚇，因為我一路都忙緊，希望佢高啲，快高長大。」
楊思琦為了愛女生活安穩，她不怕辛苦，經常到內地登台，但她希望在港可找到更多工作，方便照顧媽媽和女兒。思琦一直不想女兒曝光，現在的思想變得開放，她說：「係呀！不嬲都係，𠵱家佢大個啲，又活躍，又好奇，有時我返工去影相，都會畀佢睇嚇媽媽工作係點樣，等佢瞭解嚇，咁佢又好有印象，原來媽媽影相拍嘢係咁，都幾好，畀佢有啲體驗。」
採訪：楊潔雯
場地提供：Dr.Kong
from:
http://hk.apple.nextmedia ... 150828/19272443
