MK-Pop組合天堂鳥喺日前曾經講過，下一個MV會「正經啲」，似係唔想再走MK-Pop路線。而Faith似乎都想轉路線喎，適逢今個星期日係母親節，所以Faith昨日就推出咗個新歌MV先啱，叫做《Ma Ma Easy》...聽歌名已經感受到濃濃嘅「潛力」，Sky仲話佢俾歌詞感動到喊咗...
MV一開始就有個媽媽好辛苦咁喺度切菜，之後鏡頭一轉就見到Faith三個企咗喺度，用佢哋慣性嘅無力聲線，一齊撥一撥隻手，唱出第一句歌詞：「媽媽今天不必擔心我」。而今次亦都同上首歌一樣，無力嘅舞蹈...之後左腳踏一下右腳踏一下；左手chok一下右手chok一下....而且同上一次一樣，係唔齊嘅，最齊嗰吓就係三個一齊嚟個轉身。
成個MV都係佢三個喺度un，中段有佢哋三個喺度抄寫：「媽媽今天不必擔心我」，非常好。
去到尾段仲有Sky嘅「世界級」rap，緊接住由三子合力唱出「世界級」嘅歌詞：「MA MA EASY MA MA DUN WORRY」，嚟咗個2 combo，好多網民即時頂唔住熄咗。
啲網民睇完聽完之後，就話啦「醬爆味濃」、「諗起章魚城（張如城）」、「唔敢睇」、「仲衰過上次」等等，仲有人懷疑佢哋轉戰兒歌界。
其實大家睇晒之後，一定會狂笑Faith O架啦。但係除咗三位主角嘅歌喉舞技同埋歌詞之外，仲有啲好好笑嘅嘢，就係成個MV嘅製作。先係個場地，都唔知係唔係佢哋三個其中一個嘅屋企，地方都廢事租，但當然呢個場都有可能係租，但係下次租嘅話，可唔可以租一個好少少嘅地方呢？第二樣好笑嘅，係燈光，成個MV好似冇錢請人打燈咁，Faith三子個樣暗到睇唔到輪廓，又要梳埋一樣嘅髮型...做咩啫！
from:
http://hk.apple.nextmedia ... 140510/18715626
