賽馬圈一向係男士嘅主場，女士若要做馬評人，實在路難行。○四年放棄o靚模事業投身馬評人行列嘅李潔瑩，入行波折重重，當年因為太年輕而慘遭馬迷白眼，惟有轉行，兜兜轉轉至今成為本港最年輕嘅女馬評人。李潔瑩話，賽馬再不只係博彩，既可欣賞騎術，更可享受家庭樂，連女馬評人都獲得尊重，終在馬圈闖出一片天。
本港有五名女馬評人，三十歲嘅潔瑩係當中最年輕嘅一位。佢自四歲起已接觸賽馬運動，為來往中港兩地嘅爸爸抄賽事結果，到畢業後投考賽馬廣播新人選拔，成功打入三甲，成為馬評人。當年佢年僅二十歲就獨自分析賽事，當然無人理會啦，更被指係唔識跑馬嘅o靚妹。之後佢轉職空姐兩年，○八年航空公司結業，眼見馬場風氣逐漸改變，於是就重投馬評人行列。
潔瑩約十年前入行時嘅首場馬評係婦女銀袋賽，咁啱後日又係本年度嘅婦女銀袋日，事隔近十年，佢終進身成為全職馬評人，社交網站追隨者有近一萬五千人，而男友亦係騎師。佢希望馬圈增加女性比例，讓女性細心同親和力打入馬圈，「沿途走勢評述都仲未有女性做到，遲啲想挑戰講吓試閘、晨操。」盼有一天女士都能夠成為沿途走勢評述員。
http://orientaldaily.on.c ... /00176_094.html
