育有2歲女兒卓穎的楊思琦，7月將約滿TVB，近日開始洽談續約，可惜無綫冇體諒思琦妹壓力，乘機壓價要她減人工，除踩楊思琦是單親媽媽失去觀眾緣，又數落冇家庭市場兼不再少女feel為理由，提出減價三分一至奀星價續約。
馬死落地行，焗簽嘅思琦妹更被安排做鍾嘉欣細媽，爭5年咋，陰功！
無綫繼續一台獨大，藝員冇出路，近日傾續約時紛紛被壓價，其中要獨力養女的35歲楊思琦亦被打壓。據知與楊思琦傾續約的並非樂易玲等高層，TVB藝員科經理何其穎將思琦原本每個騷3千元大減三分一至2千，即係接近「𡃁妹」李綺雯及姚子羚等級數，而且傾談內容極之刻薄。知情人士透露：「何其穎同思琦妹講：『sell你親子又唔係，少女又過咗、又冇乜劇上，你個位置都好尷尬吓！』講到咁，思琦妹邊有得出聲吖！」
楊思琦與吳帥（右圖）分手，雖傳吳帥一直沒有盡父責，但思琦仍經常晒與2歲愛女楊卓穎的美滿生活照，現實上卻遭公司壓價，生活艱難呀！
楊思琦前年由美國洛杉磯返港好大陣仗，無綫樂易玲和經理人專程接機，𠵱家就大跌價。
望留喺無綫雖然楊思琦做過女一又叫紅過，但近年因感情問題而形象大跌，即使產女後重返TVB已2年，但重用程度已大不如前。復出兩年才拍到劇集《大藥坊》，在劇中更要演阿媽級，飾演下月就30歲的鍾嘉欣細媽，做韓瑪利老公杜燕歌「妾侍」，打扮老成，戲分不多。
據知楊思琦復出後接商場騷亦被壓價，每次只得1至2萬，而最近在電影《黑色喜劇》中演出，更只得6,000蚊一日。
上週六她出席一個兒童學習中心活動時回應：「我知大家好關心，個約仲傾緊，到時話畀大家聽啦。」問到被TVB壓價，是否寧願返內地發展，她就強顏歡笑地說：「冇啲咁嘅事！我好愛TVB，當然大陸都係可以發展得好好嘅地方，但會考慮喺無綫囉。」至於超平價接騷，她表示：「係人都想用平啲嘅價錢㗎啦，幾錢我唔清楚喎，公司接嘅。」她承認TVB暫時未安排新劇給她，認為在《大藥坊》演妾侍是一個挑戰，唔介意咁話，思琦姐勝在EQ高囉！
加咀戲
網上圖片
錢國偉與思琦有一場床上戲，錢導更臨時要求加接吻戲，明益自己。
冇怨言
《蘋果日報》圖片
楊思琦甚少拍電影，近期上映的《黑色喜劇》中要演性感尤物，雖然只係收6,000蚊一日，但早前喺首映禮上仍然着到鬼咁性感兼俾肥導演錢國偉攬實，堅專業㗎！
做嘉欣媽
思琦妹復出後首部劇集《大藥坊》做鍾嘉欣細媽、杜燕歌妾侍，同三線敖嘉年有感情線，完成《大》劇後，她表示無綫未有新工作給她。
楊怡起飛腳失敗
無綫現花旦荒，楊怡的去留問題受樂易玲重視；而一度傳離職的經理人嘉莉（箭嘴）留任，亦有助留住楊怡。
所謂同人唔同命，楊怡將於4月約滿，有傳楊怡想仿效佘詩曼提出5千萬簽3年天價續約，要求拍內地劇，無綫則還價3千萬簽兩年。
但據知楊怡其實跟佘詩曼在內地的叫座力差天共地，一直只得兩間內地中小型公司向她招手，在冇選擇下，早前楊怡已跟TVB達成續約協議，據知TVB亦對楊怡從優，拍劇酬勞加至2萬一集，已算是花旦之冠！3千萬？梗係冇啦。
單親要剝單親媽媽在娛樂圈的確幾難捱，好似曾經息影嫁人的羅霖和模媽Mia（陳靜儀），都要靠性感剝衫賺錢養家，希望楊思琦唔使行呢步！
羅霖出浴
48歲羅霖育有3名兒子，去年結束與劉坤銘17年婚姻，毅然復出接拍陶傑的《愛．尋．迷》，與關楚耀有多場咀戲及床戲，羅霖拍之前仲要開家庭會議，得到囝囝同意才接拍。
Mia全裸
25歲模媽Mia有一仔一女，與老公莊家傑離婚後為養育兒女成為𡃁模，出過多本性感寫真，在《喜愛夜蒲2》中飾演私鐘妹更全裸上陣，前夫則與《求愛》Whitney結婚兼已宣布有喜，預產期7月。
採訪、撰文、
