莊思敏呻高撩韓男合作
電影《DELETE愛人》昨日於灣仔會展舉行記者招待會，身為主演的王祖藍、莊思敏以及導演葉念琛在活動中亮相，更邀得名魔術師甄澤權擔任表演嘉賓，即席表演變銀紙魔術，令現場觀眾嘩然。
莊思敏對自己的身高大感煩惱，呻除難搵男友外又影響工作。
儲定老婆本
王祖藍指新戲將於4月在內地上映，而香港檔期則在5月。第一次為全國上映的電影擔正，祖藍笑言對票房沒有壓力：「不嬲都冇壓力，當係試水溫，都希望有5千萬票房。」近期電影電視作品多多的祖藍又指自己身在搏殺期，更準備儲老婆本娶女友李亞男，問到計劃搵多少錢娶對方，祖藍即時賣口乖指女友係「無價寶」：「無話要幾錢娶佢嘅，不過希望手頭可以鬆動啲。」
有粗口對白
而同場的莊思敏透露在《DELETE愛人》的角色有粗口對白，似自己大情大性，笑言可以演番佢自己。更配合電影主題，笑言如果可以選擇，希望可以Delete自己的身高：「覺得好煩惱，唔好話搵男友，連工作都受影響，曾經有電影公司老闆話我太高，難搵男演員襯，希望電影公司可以搵啲韓國男士同我合作。（搵金秀賢？）想搵李敏鎬多啲，金秀賢佢係搵啱咗個髮型，如果佢露個額頭出嚟就會變樣。」
對票房冇壓力的祖藍準備儲老婆本娶李亞男。
李亞男
甄澤權表演變銀紙魔術，贏盡掌聲。
家輝爆Kelly大花筒
Kelly穿露腰裝，襯煲呔男神梁家輝（左）和鄭伊健。
陳慧琳（Kelly）、梁家輝及鄭伊健前晚在圓方出席新片《盜馬記》首映，潮媽Kelly身穿CHICTOPIA露腰套裝亮相，家輝及伊健不約而同打煲呔，家輝自封男神兼拖伊健落水：「我哋兩個都係男神，我係上一代。」伊健接住話：「我係中一代。」
家輝說得興起，踢爆Kelly大花筒：「喺歐洲拍戲成個月，Kelly好唔慳家，使好多錢買嘢。」Kelly自辯：「佢哋誇張，黐線，好平之嘛，都唔係買名牌，買指甲銼、啤酒cream，冇手袋冇靚衫，全家都有份。」
此外，Kelly爆老公湊仔嫌辛苦：「我之前返內地宣傳十日，佢都話頂唔順，叫我快啲返屋企，我咪同佢講，知我平時幾辛苦呢！」
