陳展鵬與鍾嘉欣的緋聞傳個沒完沒了，近日展鵬又被指撻着唐詩詠，令關係「七國咁亂」。陳展鵬、鍾嘉欣與唐詩詠昨日到灣仔出席無綫活動碰頭，鍾嘉欣斬纜說：「我鍾意簡單關係，唔想搞三四五角戀，我拒絕呢啲關係！」
鍾嘉欣見到好姊妹杏兒即上前送抱。
無綫繼續晒冷，昨日出動當紅花旦小生到灣仔會展「香港國際影視展2014」推介新劇，包括鍾嘉欣、陳展鵬、唐詩詠、萬綺雯、蕭正楠、苟芸慧、郭晉安、田蕊妮、馬國明等，鍾嘉欣與好友胡杏兒一見面即開心抱抱。而大會播出新劇片段，當中以郭晉安與田蕊妮孭飛的《忠奸人》最注目，阿田除有露背鏡頭，二人還有多個激咀場面。
同伍允龍最熟
陳展鵬與鍾嘉欣的緋聞傳個不停，近日又指陳展鵬撻着唐詩詠，故事發展成多角混戰關係。三位緋聞主角昨日同台碰頭，大方合照。嘉欣被問是否遭男方「拋棄」？她笑說：「點解係佢唔要我？唔係我唔要佢呀？哈哈！我個人鍾意簡單關係，唔想搞三四五角戀，我拒絕呢啲關係。」問到陳展鵬與詩詠是否配襯時，她則謂對兩人未有深入了解，認為最重要是溝通，外表是其次。記者即笑與嘉欣最襯的一定是伍允龍，她笑說：「我唔識答，咁我同阿龍就係熟啲嘅。」
TVB繼續晒冷出席「香港國際影視展2014」。
最近傳陳展鵬撻着唐詩詠（右二），鍾嘉欣揚言拒絕複雜關係。
郭晉安與田蕊妮於新劇有激咀片段。
大讚優質筍盤
新緋聞男友陳展鵬與唐詩詠齊齊接受訪問，並齊聲否認拍拖，二人認為因太Dry而傳緋聞，陳展鵬笑說：「詩詠係好女仔嚟，人又專一，我好開心能夠同優質筍盤傳緋聞，有時緣分就係咁開始，哈哈。」至於問詩詠與展鵬可有發展機會？她說：「緣分好難講，我都等緊呢個人出現，但係我想喺戲內同擦出火花先。（崔建邦呢？）佢係朋友，過去式嚟。」
Donald藐盡婆媳糾紛
Donald將於棟篤笑中扮演多個身份。
商台DJ Donald（唐劍康）將於下月初在新光戲院舉行首個個人處男棟篤笑「當奴All You Gag歡樂阿家藐咀騷」，今次他會扮演多個身份演出。Donald在節目《口水多過浪花》中的廣播劇《真情》，扮演專門對付新抱的家婆「阿家」，破壞新抱與兒子二人世界，手段風趣搞笑，他笑謂：「呢個係梁舜燕、李司棋混合嘅上等人，藐盡所有事。現實生活中，好多人經歷咗奶奶同新抱嘅磨擦，兩者關係好玄妙，我收集緊好多人嘅意見同故事。」
問Donald有否把太太的經歷放上舞台？他謂：「托賴，冇遇到呢啲問題，大家相處好好，外母本身係外國人，但溝通冇問題。」為這個騷，Donald要改善「失憶」惡習：「平時做節目，嘟姐（鄭裕玲）都話我零記性，我好怕到時忘記啲稿。」
