北上發展的劉愷威昨日回港出席無綫推介新劇《風雲天地》的活動，他透露內地女星太太楊冪現時懷胎六個月，初期偶有嘔吐，楊冪現留港待產並由其父母照料，很大機會選擇在港分娩。問到BB的性別時，他說：「我哋真係未知，因為想保存驚喜，所以都冇問醫生，內心都好掙扎，唔知下次產檢忍唔忍得住問醫生，自己初時希望係女，想有個小公主，依家就冇所謂，最緊要BB健康。」劉愷威又指屆時一定會陪太太入產房，若得到醫生批准，一定會為BB剪臍帶。
劉愷威在宣傳活動上，不時與李詩韻傾偈。
問到在內地走紅的他會否返無綫拍劇？他說：「TVB依家咁多小生、花旦，唔使啦。」是否賺慣「人仔」嫌TVB出手低？他說：「唔係，今次一來可以同汪明荃、黃淑儀兩位合作，二來又可以喺香港，可以返屋企。」
劉愷威想幫BB剪臍帶
好快升呢做老竇嘅劉愷威，噚日喺灣仔出席影視博覽活動，提及已懷孕六個月嘅老婆楊冪，佢話雙親正在照顧喺香港安胎嘅老婆，至於BB性別，佢話：「我哋想保持神秘感，所以冇問醫生，BB健康已經好足夠。」不過佢都好老實話想有小公主先喎，仲話每次檢查時聽到BB心跳都好開心。劉愷威預計會陪老婆留港分娩，仲想親自為BB剪臍帶，至於BB改乜名就交由爺爺劉丹負責。
