一直係高登巴打女神之一嘅美棋BB黃美棋，最近同佘詩曼契細佬麥子樂合作微電影《錯過》，星期日（三月二十三日）美棋BB仲响社交網站預告要拍床戲，唔少巴打留言話想做張床，又擔心女神會蝕底俾對手。
成為港視小花後，美棋BB床戲嘴戲通通未拍過，所以導演好識做，拍床戲當晚，買咗成打啤酒，希望美棋BB同麥子樂飲番兩杯後醉醉哋入戲。
其實所謂嘅床戲，導演只係要求佢兩個响床上面玩玩吓再情深互嘴，唔使除衫露肉，但美棋BB一直扭計唔肯嘴，又唔肯俾人掂，麥子樂見佢咁錫身，更加唔敢亂嚟！
床戲拍唔成，美棋BB再响社交網留言：「雖然第一次拍床（戲），但係放心啦各位，我係冇改變過我唔行性感嘅原則，因為我係冇除過衫同著長褲嫁（㗎）！哈哈！」為咗保住班粉絲巴打，美棋BB寧願犧牲演員道德，好冇操守啫！
唔肯拍接吻戲，導演降低要求，叫麥子樂孭起美棋BB後撻佢落床，再成個人壓上去，點知美棋BB唔肯俾人壓，仲鬧麥子樂：「你咁大力撻我！」
現場有啤酒款待男女主角，美棋BB雖然有飲番兩杯，但對佢拍床戲完全冇幫助。
拍完「床戲」，美棋BB安慰粉絲巴打，話自己有著衫褲上床，冇蝕到底。
