周潤發夫婦、千億新抱徐子淇及《華爾街狼人》女主角Margot Robbie等，昨晚於中環為德國品牌Hugo Boss的旗艦店主持開幕禮，發哥大談收身之道。對於被讚靚仔，發哥說：「多謝！」是否吃了回春藥？他笑說：「我去咗史丹利街回春堂飲回春藥。」見發哥瘦了不少，問他有否瘦了40磅？他說：「冇，瘦咗30磅，之前拍戲開始減，減咗9個月，唔會再瘦，得排骨！我又鍾意食嘢，好隊得，菜、魚、飯、肉，好正常。」
發哥透露午餐多食水果、蕃薯及麵飯等清淡食物，更謂現時揹少30磅，感覺很舒服，他說：「行路都行得快啲！」會否看中醫調理身體？發哥說：「間中會踩背，長期瘦身。」他現時每周都會行山強身健體，他說：「都有同小方（方力申）去行山，好舒服，以前拍外景都冇欣賞，𠵱家每星期都會去。」稍後他會到廣州拍攝杜琪峯的新片，並由張叔平為他造戲服：「阿叔嫌我塊面肥，我十日唔食飯！」
徐子淇與Margot Robbie難得碰頭，自然要合照留念。
另外，徐子淇身穿一襲黑色露肩晚裝，甫到場便與Margot Robbie合照，她更代表智行基金送紀念品予品牌高層。子淇又透露去年滑雪時，老公李家誠不慎受傷，但一直未睇醫生，最後發現韌帶斷裂要做手術。
發哥激減30磅發嫂心痛嗌停
國際巨星周潤發昨晚與發嫂拍拖出席時裝品牌活動，明顯瘦了一圈的發哥表示9個月以來共瘦了30磅：「依家得番棚骨！」雖然瘦身後感覺良好，但發嫂就心痛指發哥已經夠瘦，是時候要stop，盡顯夫妻恩愛。
發哥激減30磅，瘦了一圈，但精神極佳，說到有趣之處手舞足蹈。
周潤發與太太陳薈蓮昨晚拍拖出席BOSS旗艦店開幕剪綵儀式，與《華爾街狼人》女主角Margot Robbie、千億新抱李徐子淇等一同擔任剪綵嘉賓，品牌新任女裝藝術總監Jason Wu亦有到場。明顯瘦了一圈的發哥被問到是否如傳聞所指瘦了40磅？他說：「係瘦咗30磅，由拍《賭城風雲》開始到依家得番棚骨，唔會再瘦。我不知幾鍾意食嘢，魚肉菜飯都鍾意食，正常飲食，（發嫂嫌你太瘦？）唔會，瘦咗30磅好舒服，行路都行快啲！（王晶話你靚仔？）佢都靚仔呀，佢仲話要出嚟頂我（角色）。」
嘲霆鋒似神仙
發哥坦言近日迷上行山，因為覺得很舒服，之前拍外景無暇欣賞景色，現在每周都會去行山。問他會否再跟謝霆鋒合作？他續說：「要睇佢時間，同埋佢鍾唔鍾意個劇本。佢都好挑剔，佢依家忙緊周圍飛拍飲食節目嘛，（你有冇試過佢手勢？）拍戲現場淨係見佢食烚蛋，唔使食嘢，神仙嚟o架佢，（佢有冇請你做嘉賓？）佢有同發嫂提過，但時間唔太夾。」他透露現時正拍攝杜琪峯的電影，與陳奕迅及湯唯等合作，又爆為其做服裝的張叔平指他面頰兩旁仍要減，發哥笑說：「我10日唔可以食嘢喇！」記者打趣問發嫂喜歡發哥肥還是瘦？她笑說：「依家夠喇，要stop喇，（發哥依家靚唔靚仔？）佢不嬲都咁靚仔。」
集郵慘變「裸照」
同場的李徐子淇就自稱向發哥「集郵」，笑言發哥大玩「高炒自拍」，令穿tube dress的她頓變「裸照」。她透露老公李家誠過年前傷了右腳靭帶，痛得沒胃口，瘦了10多磅，而她在這段時間充當老公的私人看護，深切體會夫妻二人要互相照顧。
李徐子淇與Margot傾個不停。
（左起）Jason Wu、Margot Robbie、李徐子淇、發哥與發嫂出席品牌剪綵儀式。
