嘉玲講到當年被綁架和周刊封面事件，回想到母親的反應，她忍不住眼泛淚光。電視圖片
事業家庭兩得意的劉嘉玲，人生曾陷入黑暗期，90年因為拒拍電影招來橫禍，事發十多年後，02年突被雜誌刊出當時照片，無疑再揭嘉玲傷疤。勇敢的她現已釋懷，前晚無綫播出她在《最佳女主角》的訪問，再次坦然面對，嘉玲強調沒被侵犯，事件發生後得到家人扶持，她哭談母親的關愛，至於老公梁朝偉，她則說：「佢係驚我喺18樓跳落嚟。」偉仔即使返工都不忘請朋友來家照顧她。
現年47歲的劉嘉玲，人生路上曾經歷過被綁架和周刊封面風波，事過境遷，她近日接受黎芷珊主持的無綫節目《最佳女主角》訪問，嘉玲不介意舊事重提，經歷的那段黑暗日子，她慶幸媽咪、丈夫梁朝偉及身邊好友支持，她更不諱言指自己情緒低落時，偉仔曾擔心她會跳樓自殺。
性格堅強的嘉玲已由困境中釋放了，02年《東周刊》刊登她遭綁架的照片，全城憤怒，演藝界又發起「天地不容」遊行抗議，前晚《女主角》播出嘉玲訪問，重提舊事，她侃侃而談：「對我嚟講冇乜嘢唔可以再提，今時今日嘅我就係我每一步咁行過來，《東周刊》又好，或一啲生活考驗，會令我從中搵到一啲原因更強壯自己。我亦好感恩嗰次事件發生（指東周刊事件），令我重新再認識自己，重新畀我覺得香港人係愛我嘅，嗰一次好多團體自發上街遊行，買報紙嘅阿嬸為我流淚，呢啲畫面我全部記得，令我感動，上天可能要你經歷一啲重大嘅考驗，你先有重生嘅機會。」
嘉玲憶述當年遭四個人綁架，強調沒遭侵犯。
哭到眼紅紅的嘉玲，坦言已經釋懷。
「佢哋真係冇侵犯我」
嘉玲當時怎面對事件？她回憶遭綁架事件說：「我𠵱家仲記得係四個人綁咗我走，佢哋（指綁匪）應該仲喺度，佢哋唔係好老，我到𠵱家仲要好感謝你哋（嘉玲望向鏡頭），佢哋真係冇侵犯我，如果有一日我見到佢哋四個，我都仲要當面多謝佢哋，因為其實成件事係上面有個人指使佢哋，我係冇拍到一部戲，嗰個人可能要做一個殺雞儆猴，『嗱，我啲戲你唔可以唔拍，唔係你就好似佢咁！』佢哋冇侵犯我，但過程當然係好恐怖，再十年之後再一次，係對我有傷害嘅，改變咗我對人嘅睇法。」
問嘉玲在周刊封面風波後，生活是否如行屍走肉？她說：「係，我匿喺屋企唔敢出街，我覺得俾世界遺棄咗，唔識面對人，之前你知道俾人影咗相，但冇人睇到，𠵱家係全世界人都睇到，我唔識去面對呢件事。嗰時係覺得同自己相處最多嘅時間，因為我成日一個人傾偈。」
嘉玲前晚在上海出席活動，打扮高貴撐場。
「媽咪反應我最難受」
嘉玲續說：「我好多謝身邊嘅朋友，張叔平、梁生（梁朝偉），媽咪反應令我最難受，佢一句說話都冇講，只係喺度做家務，佢嗰隻感覺呢……係我好難過，因為佢覺得，我哋都係俾人遺棄，你點努力都冇用，呢個畫面我係好難受，但係𠵱家都過咗，我諗我阿媽𠵱家好開心。」提起母親，再堅強的嘉玲雙眼熱淚盈眶，顯得眼紅紅。
至於當時偉仔如何處理？嘉玲說：「佢之前知我發生咗事，佢有個底喺度，佢都同我講『不如離開呢個世界，我唔拍戲，我陪你去另外一個國家，唔好再留喺呢個地方，咁鬼黑暗、咁鬼冇人情。』再發生，佢係驚我出事，佢當時又要返工，佢要出去返工時會打電話叫我啲朋友『你今日得閒去陪吓佢，同佢傾吓偈，陪佢食啲嘢。』因為我唔食嘢，我覺得佢係驚我喺18樓跳落嚟啩，呢啲好細微嘢我都好記得，仲有中間有個人好重要，係青霞姐姐，佢寫咗封信畀我，叫我接受、面對、處理、放下，一直受用到𠵱家。有機會我都會話畀困境年輕人或朋友聽呢八個字。」
嘉玲指發生不快遭遇時，得到梁朝偉和林青霞（右二）的關懷。
嘉玲前晚在節目中不介意自揭傷心事，她昨接受本報電話訪問說：「呢兩件事（指綁架和封面照）係我人生最大傷害，兩件事發生時，我感激偉仔喺我身邊，對我信任同支持，令我可以捱過去。當時我得兩條路，一係去死，一係堅強活下去，我選擇咗堅強活下去，身邊朋友同家人支持，對我都好大幫助。而且呢個炸彈遲早會爆，一次過流出嚟，反而仲冇後顧之憂。」
既然傷害如此大，為何嘉玲仍坦然剖白？她說：「件事過咗去，我只係一個受害者，與其大家去猜去估，不如我坦白講出嚟，事件已終結，件事咁耐，我都釋懷咗，我事無不可對人言。」
張曼玉（右）和嘉玲84年合作劇集《新紮師兄》，兩女當年一臉稚氣。劇照
「Maggie叫我求佢」
另外，嘉玲在節目中提到當年上山詩鈉轉行賣保險，她不但買一份支持，更幫口游說張曼玉（Maggie）買，嘉玲說：「Maggie叫我求佢，我即刻求佢，佢就買咗。」前晚嘉玲這集《女主角》平均收視22點（約141萬觀眾），最高收視23點（約148萬觀眾），比之前其他的訪問平均收視約19、20點（約128萬觀眾），多近20萬觀眾收看。
from:
http://hk.apple.nextmedia ... 131116/18509979
