無綫新劇《On Call36小時II》今晚首播，馬國明、楊怡、羅仲謙同袁偉豪等演員噚日去咗葵芳宣傳，吳啟華因為喺內地拍劇冇出席，司儀介紹演員出場時，楊怡拖住馬明出嚟，仲話呢個係佢老公，反而同男友羅仲謙就好避忌。
為配合劇名，玩遊戲時，啲演員無論玩呼拉圈定掌上壓，都要做36下，馬明同羅仲謙做掌上壓時就揸流攤，扮監察人哋做，自己停喺度做少幾下，結果兩個被罰做單手掌上壓，羅仲謙仲好招積咁話自己神枱級，所以唔使郁。當謙仔被罰時，司儀問楊怡收唔收貨？楊怡話：「唔使喇！我只想快啲，好熱呀！」有偏幫男友之嫌。
事後講到偏幫謙仔唔使做掌上壓，謙仔話阿怡只係想個流程快啲，強調唔係對佢特別關照，楊怡就話：「如果現場冷氣勁啲，我叫佢做多啲啦！」兩個擺到明耍花槍！講到收視，楊怡話有一定信心，但因為承接第二輯，所以有啲壓力，要谷吓宣傳，睇嚟佢同謙仔嘅戀情都幫到啲。
楊怡同男友羅仲謙心有靈犀，噚日齊齊着黑色服飾宣傳新劇。楊怡拖住馬國明出嚟話係佢老公，完全唔理羅仲謙感受。
羅仲謙被罰做單手掌上壓，有馬國明扶住，繼續揸流攤。
黃智雯雖然唔識玩呼拉圈，但勝在條短裙有睇頭。
馬明奉旨𥄫女
男主角馬明幾乎套套劇都好有艷福，但佢話今次冇，馬明笑言：「第一男主角（指吳啟華）有好多感情線，我只係陪男主角去追女仔，不過睇吓都開心。」講到今年嘅視帝係佢同張智霖之爭，馬明話仲有好多人，例如黃子華套劇就嚟上，佢話有得同前輩爭已經開心。
版主：陳基征
from:
http://hk.apple.nextmedia ... 131104/18491746
