仲記得十年前當卡拉OK開到成行成市時，媽咪姐每次揀歌，實點吳佩慈首〈閃着淚光的決定〉。早前呢位34歲台灣女星，忽然自爆未婚懷胎四個月，仲話要等埋肚裏面嘅囡囡出世，自己修好身先做靚靚新娘出嫁。
喺園林實景食完個lunch，大肚婆吳佩慈舒舒服服攤喺梳化度，預演定夢幻嘅闊太生活。
唔知係咪佗女關係，零化妝嘅吳佩慈皮膚白淨滑溜，不過媽咪姐經驗之談，生仔會大量甩頭髮，髮線比較後嘅佢，真係要食多啲首烏預防一下。
睇我個樣，就知我天生闊太相啦！（設計對白）
吳佩慈肯爆響口認自己未婚大肚，皆因B女老竇係澳門永利酒店股東、坐擁百億新台幣身家嘅紀曉波。日前，媽咪姐就見到等住做闊太嘅吳佩慈，喺ifc同友人high tea。當日素顏嘅佢，着到白雪雪咁出街，喺室外食完個lunch，再轉戰入室內嘆coffee，優哉游哉，真係羨慕死媽咪姐。
