劉鑾雄女友陳凱韻（甘比）大前日34歲牛一，佢呢排都忙於慶祝，繼正日生日佢同咗同月同日生日嘅陳奕迅寶貝女康堤去咗迪士尼開P慶祝，甘比前日又獲大劉同佢喺灣仔福臨門飲茶，前晚甘比就帶一對仔女同家人去咗大坑鮨辰嘆日本菜，其間仲見佢好友周麗淇（Niki）素顏離開，為咗迴避門外記者鏡頭，Niki將漁夫帽拉到低無可低，冇化妝嘅佢油光滿臉，影相都反光，幾得人驚！
周麗淇前晚素顏出動偏偏撞正記者追訪，佢拿拿臨拉低頂帽頭耷耷避鏡頭。
前晚7點幾，見到甘比坐開嘅幾部保母車停咗喺餐廳附近，佢嘅保鑣又企喺門口，大約8點幾，先見着白色上衣配紅褲嘅Niki單獨出嚟，有記者追問點解唔見佢嗰位內地富二代男友徐正曦？佢低頭細細聲話：「我走啦。」Niki於是行咗去佢架白色座駕度開車走，佢又全程頭耷耷，咁樣開車其實都好危險吓。
甘比細仔生濕疹
Niki走咗10分鐘左右，就輪到甘比一家大細出嚟，除咗有佢一對仔女、甘比阿媽、家姐，同埋大劉胞妹劉玉珍同仔女，一行十幾人好熱鬧，甘比呢餐生日飯一定食得好開心。甘比阿媽抱住乖孫，不過BB臉上近嘴部有幾撻濕疹。
此外，大劉涉及歐文龍賄賂案今喺澳門續審，噚日佢繼續同屋企人喺灣仔福臨門家庭日，同女友呂麗君、一對仔女會合母親同阿妹劉玉珍嘆茶。
甘比家姐細心照顧姨甥女秀樺（右）同小朋友離開。
轉着杏色風褸嘅大劉，噚日拖實女兒秀盈到福臨門。
from:
http://hk.apple.nextmedia ... 131007/18452573
