歌手鄭家星（Carlson）憑參演電影《葉問》初上大銀幕，回想當年「血淚」，幸得「老竇」任達華「傍住」，Carlson更自爆常同華哥大談「子女經」，歌影兩棲的Carlson早前更推出國語碟，實行化身「療傷王子」，幫情傷的人重新上路！
歌影兩棲的Carlson早前推出國語碟，化身「療傷王子」。
現年23歲的歌手鄭家星醉心音樂事業，在成為歌手前，早已被黃百鳴睇中，年僅17歲就有幸參演《葉問》系列中周光耀一角，成為巨星任達華之子，並與「宇宙最強」的甄子丹合作。
Carlson有幸參演《葉問》，與任達華（左）及甄子丹合作獲益良多。
片場變豬頭
回想初入片場的辛酸，Carlson至今仍歷歷在目，他說：「喺片場乜都唔識，成日畀人鬧，拍戲時仲要畀人打到『豬頭』，當時好想放棄，靜雞雞打電話畀媽咪話想返屋企。」雖然辛苦到爆，但Carlson就慶幸能結識到「老竇」任達華，更自爆同華哥成日「斟密計」：「華哥成日教我做戲，而且當時咁啱佢想幫個女搵小學，所以問咗我好多意見，發現原來佢份人好幽默！」Carlson又話每逢準備「埋位」，子丹都會Cool爆「抦埋一邊」培養情緒，搞到全世界都不敢上前打擾。
療傷系情歌
至於唱歌方面，Carlson去年專程飛到台灣深造，同時推出首張國語碟，Carlson話好鍾意將個人的愛情經歷化為歌詞，借此引起共鳴：「好記得中學嘅時候，女朋友另結新歡，狠狠地消失咗，連畀我掹番嘅機會都冇，隔咗一段時間，佢突然發短訊話覺得我最好，究竟發生乜事？」從這悲慘的愛情故事後，Carlson希望憑自己的療傷情歌，推動「同路人」堅強地走下去，問到可會從此「怕咗」女仔？Carlson豁然開朗地說：「一切都睇緣分，反而多得件事，畀咗我好多創作靈感。」
from:
http://orientaldaily.on.c ... /00282_089.html
