【銅鑼灣】歐陽德勛去年娶咗蔡立兒成家立室，結束16年愛情長跑，而噚日係德勛嘅生日，老婆蔡立兒專登喺前日幫佢搞咗個神秘飯局，請咗Big Four成員梁漢文、張衞健、蘇永康同許志安之外，仲有吳國敬同有線主播劉明軒等出席。
前晚7點，德勛原本俾老婆蔡立兒捉咗去銅鑼灣行街，行行吓去咗西苑酒家，老婆先爆話為佢準備咗個聚餐，搞到壽星仔德勛不知幾開心，而一班老友亦陸續出現酒家嘅VIP房。另一邊廂，搞手之一嘅梁漢文臨去酒家之前，同老婆林文慧（Karen）去咗Cova買生日蛋糕同朱古力慶祝，令壽星仔不知幾感動。前晚除咗安排切蛋糕，仲叫咗籠壽包畀德勛，餐飯食到差唔多10點。
梁漢文同老婆Karen前日買定蛋糕，為歐陽德勛賀壽。歐陽德勛生日，同大班好友食飯慶祝。
一班好友圍埋吹水，好開心咁喎。
安仔指手劃腳，未飲先high咁款。
DV圖片
生仔順其自然
壽星仔德勛噚日正日生日，佢接受電話訪問時婉拒透露幾多歲，只係話：「40歲中間啦，有排未到50。原本諗住生日都係咁過，不過老婆係都要我出街，去到銅鑼灣至知有咁多人到，好surprise！難得咁人齊。生日願望都係希望自己同身邊人身體健康、工作順利啦。」佢話生BB呢樣嘢順其自然喎。
from:
http://hk.apple.nextmedia ... 131010/18457103
