周麗淇（Niki）幾個月前已經傳出因為喺內地拍《大漢賢后衛子夫》，而同內地小生徐正曦撻著，不過當時Niki死口唔認，似乎驚戀情見光死。
不過早兩日，Niki同徐正曦拖手斷正，更加喺上海酒店齊齊過夜，今次真係唔輪到Niki唔認，所以噚日有報道話，前日Niki喺內地機場飛去新加坡，見到記者佢都大方承認同徐正曦蜜運中，佢話:「好開心，好開心，多謝大家關心我的感情事，希望今次好好地去過一個正常的拍拖生活。」
報道話Niki覺得徐正曦份人好乖仔，又冇不良嗜好，處事成熟又有上進心，傾傾吓仲發現大家都鍾意宇宙同UFO話題。據知徐正曦初期覺得同Niki好傾都冇追求，都係考慮到對方年紀，34歲嘅Niki年紀唔細，佢覺得做男方責任好大唔可以玩玩吓，要以結婚為前提交往，最後佢覺得搵到個有感覺嘅人唔容易，所以就決心追求。
28歲嘅徐正曦被譽為「黃曉明接班人」，去年更勁賺2000萬人仔，佢老竇係內地政府官員，家族搞五金生意身家逾億，絕對係富二代筍盤。
from:
http://hk.apple.nextmedia ... 130929/18442909
