【尖沙嘴】黃百鳴個仔黃子桓前晚同吳千語經理人鄭嘉敏喺尖沙嘴洲際酒店結婚擺酒，吳君如由秘道入場避人耳目，怕被記者追問陳可辛嘅閨蜜事件，另古天樂、甄子丹、呂良偉同熊黛林等都有去飲，而吳千語同林峯入場前攬腰合照，婚宴期間林峯同古天樂都做咗人肉佈景板，佢兩個都任影唔嬲，似係有啲醉意嘅古仔仲搭實女fans膊頭影相，走時身邊朋友都有扶一扶佢。
之後有嘉賓想千語、林峯同佢個囝囝合照，見佢哋好似一家三口咁，期間個小朋友有啲扭計，林峯就盡顯父愛慢慢𠱁小朋友又同佢玩。婚宴中段林峯又上台獻唱，為咗千語BB個經理人，佢都算出心出力喇。而黃百鳴亦都上台唱咗首《男兒當自強》，寓意阿仔要有膊頭擔起頭家。
林峯同吳千語抱住人哋個仔合照，似足一家三口！（左起）呂良偉、甄子丹、林小明、黃柏高同狄龍聚首一堂。
吳君如（右）同司馬燕密密斟。
古天樂搭實女賓客合照。
from:
http://hk.apple.nextmedia ... 130916/18424715
