星期一（九月九日）係胡定欣三十一歲生日，壽星女前一晚做完《衝上雲霄II》戶外直播，第二朝又要返電視城為新劇《點金勝手》做開鏡拜神，幾乎冇覺好瞓。
之前有傳胡定欣為咗撐好姊妹胡杏兒，對同劇對手黃宗澤不瞅不睬，至於同Bosco傳過有road嘅徐子珊，亦被列入透明對待名單。
不過開鏡拜神活動上，壽星女交足戲，同徐子珊不知幾老友，又攬又拖；至於Bosco，胡定欣更加主動到行埋去傾偈打招呼，之後記者叫合照，雖然都交到戲，不過一影完就面黑黑彈開。
拍劇同交戲一樣，最緊要培養情緒，臨近尾聲，Bosco終於「入戲」，同娛樂直播做訪問，失驚無神向壽星女送上birthday kiss，搞到被指有資格做未來視后嘅胡定欣，當堂窒咗窒，Bosco呢招先「啜」奪人，真正視后胡杏兒都未必招架得住囉！
惡作劇之吻Bosco忽然撲出嚟話要錫壽星女，胡定欣對住鏡頭冇得話NO，不過就笑唔出。
錫到冧同一情況，人物換上黃智賢，你睇胡定欣笑得幾開心。
果然係好姊妹！（設計對白）
同嘴藐藐嘅徐子珊攬晒影合照，胡定欣好戲到呢！
見到胡定欣徐子珊一齊上香，Bosco呢個眼神，好古怪。
