電視劇《衝上雲霄II》終於大結局，九霄驚魂加老土happy ending劇情，平均收視有38點（約244萬人），最高衝到上41點（約263萬人），算係近期無綫佳作。
星期日大結局當晚（九月八日），無綫响將軍澳商場搞現場直播，主角Cool魔張智霖同Holiday陳法拉都有嚟，Sam哥吳鎮宇就因為要返大陸拍劇冇影。劇中係溝女王嘅Cool魔，一出場班街坊已經叫到拆天，問現場觀眾想Holiday同邊個有情人終成眷屬，Cool魔嘅掌聲，亦明顯多過Sam哥一大截，可惜劇情唔配合，冇着落嘅Cool魔要top gun上身，誇到做番空軍揸戰機，保護地球上60億人。
對於結局安排，Chilam話唔會介意，但見劇迷咁想Cool魔同Holiday一齊，於是即場向陳法拉跪地錫手，加插另類結局，補飛安撫Cool魔迷！
聽到現場觀眾想佢同Holiday一齊，Chilam開心到跳起。
結局已定，為安撫現場觀眾，Chilam兩度跪地親吻陳法拉手背，臨時製作另一版本Holiday愛Cool魔的民意結局。
兩男爭一女，最後係冇現身嘅Sam哥吳鎮宇得米。
睇番馬國明向自己跪地求婚一幕，Head姐江美儀都忍唔住喊。
睇完大結局，成班人去咗尖沙咀打邊爐，陳法拉個閃bra，好搶眼。
