曾在facebook撰寫「10個不婚前性行為的理由」及「脫離自瀆小貼士」文章的高皓正，一度被封為「高主教」。
在大學時期主修哲學、副修性別研究的他，想不到今日會因為自己的一番性言論，惹來極大迴響。
高皓正除大膽批評現今教學制度忽略了性教育，更與大家分享太太懷孕期間，性生活一樣可以如魚得水。
「整個懷孕期間我哋都可以行房，絕對冇問題。」女兒已一歲半大，高皓正已準備向她灌輸正確的性知識，做個負責任的爸爸。
安全的兩性關係
早年高皓正開始信基督教，從此不再沉迷自瀆，現在的他只會忠於太太，決不會用別的方法解決性需要。
高皓正認為香港的教育制度太保守，才會令年青人變成性無知，「時下年青人都想深入了解『性』，可惜學校冇教，政府係有叫大家戴安全套，但點樣用？幾時用？相信仲有好多人唔知。英文、數學同化學都咁緊要，唔通性教育就唔緊要？呢方面對一個人影響先至係最大，仲會係影響一生，唔係一定要去到上生物科先開始進行性教育囉！喺美國，小朋友讀幼稚園已經教男同女嘅分別，講解兩性唔同嘅生殖器官，但香港有啲女仔十三、四歲已經試過幾次墮胎，以為一次半次冇戴套，邊有咁易會有BB。其實只要俾到正確嘅性知識佢哋，好多社會問題都可以解決。
「我未信基督時，真係有沉迷DIY（自瀆）嘅日子，呢個行為對身心有好大影響。我係過來人，想分享自己嘅性經驗，我以前做錯咗好多嘢，但今時唔同往日，我依家只會忠於太太。兩性關係首先要彼此認識，仲要愛對方同互相信任，安全嘅地方先進行性行為，唔可以隨便喺公園度做。最重要係合法啦，十六歲以下係唔可以嘅。如果大家都忠於婚後先發生性行為，相信性病呢個社會問題會冇咗九成。」
男女高潮各不同
被封為「高主教」，對性當然要有所認識，高皓正坦言這方面也需要學習及不斷鑽研。「要令女性有高潮真係因人而異，而我個人嘅信念係要好愛對方，過程要溫柔，緊張對方嘅感受，當中的確係需要有少少技巧，我都曾經靠睇書學番嚟。至少要知道女性受刺激個位置喺邊，但大部分人都誤會咗觸及G點就可以有高潮，佢唔係一個掣一拍就得，可能先要好溫柔錫對方耳仔呀，幫佢按摩呀，讚美對方，令對方慢慢進入狀態；但男仔就好唔同，只要集中喺性器官去行動，唔使兩分鐘就會有高潮。
「我都試過性沉溺後分唔清身體真實需要，因為好易慣性挑起性慾，所以成日都想要，每日可能會DIY幾次先得。」
懷孕無礙性生活敢言的他，甚至公開與太太懷孕時的閨房樂，「太太由懷孕到生BB，對我嘅性生活都冇任何影響，我好感恩。因為我同太太關係真係好好，佢本身又係醫生，我哋都清楚了解大家嘅身體狀況，咁就唔會有心理障礙。整個懷孕期間我哋都可以行房，只要放鬆好似平時咁，絕對冇問題。到太太生完BB，可能會容易攰，我會同佢按摩，令佢舒服啲。生理上唔覺太太生完有咩唔同，心理上就覺得太太好偉大，我會願意為佢付出更多，太太仲多一份女人韻味，吸引過以前。」
高皓正10年與拍拖年多的醫生女友陸凱兒結婚，去年2月女兒高純意（Rhema）出世。他絕不會讓女兒對性一無所知，將會從小灌輸正確的性知識。
當年去斐濟影婚紗相，高皓正着住條紅色平腳內褲展雄風，效果激凸，思想果然夠前衞。
協力：李梓軒
錄像：盧芷斌
場地提供：拉斐特
