媽咪姐蠢蠢哋，上期俾羅蘭姐個「麥當勞頭」考起咗，所以叫今期「IQ考考笑」主角徐子珊出條簡單啲嘅俾大家估吓。答案純粹捉字蝨兼無聊，大家快動吓腦筋！
MC JIN：係咪四字成語嚟㗎？
好耐冇蒲頭嘅MC JIN，竟然一聽到IQ題即話：「死喇！開唔正我嗰瓣㖭！係咪四字成語嚟㗎？」本身係ABC嘅佢猛咁諗：「苦嘅相反係甜……」最後誤打誤撞竟然撞中咗，但都唔知點解喎。
陳敏之：點難到我呀！
近來拍劇成日扮演差婆角色嘅敏之，可能查得案多，頭腦都靈活啲，一瞬間就估到喇。「麵包A唔係苦……我梗係知啦，考我唔到嘅！」
梁政珏：咪以為我冇腦！
喺《衝上雲霄II》同「Cool魔」張智霖性感調情大灑鹽花嘅梁政珏，咪以為佢只識賣弄身材，其實都幾聰明，好快估中答案。「你咪以為我冇腦，我成日猜謎語㗎！」
黎諾懿：我投降！
聽完問題，黎諾懿好努力估A、B、C、D，估咗廿秒，就俾人催逼入廠開《愛•回家》。臨走嗰陣，佢仲耍晒冧咁話：「背對白都背到頭暈，sorry，我投降！」見你咁慘，放過你啦！
江美儀：男人面前我零舍蠢！
表面好sharp醒嘅「Head姐」江美儀，原來面對IQ題就嗌晒救命，向助手求救。「其實我好蠢㗎咋，尤其喺男人面前，我零舍蠢。」驚男人你就最醒嘞！
答案開估：C，麵包C苦（師傅）
