鄭中基近日同吳君如趕拍緊谷德昭導演嘅賀歲電影《六福臨門》，差不多日日都要開工，搞到中基少咗時間同兩歲嘅囡囡Emma玩。前日中基趁住休息唔使開工，即刻同老婆余思敏（Sammie）帶埋囡囡去街。中基一身佬打扮，最搶眼就係佢對金色Nike波鞋配合老婆素顏師奶feel，一家三口連埋七人車司機同外籍傭工，先去咗中環萬邦行行咗一陣。
趁㩒錢食煙
中基慈父上身負責殿後抱囡囡上車，架車行咗一陣之後又駛埋一邊，原來中基落車㩒錢，佢一落車已經急不及待點起支煙邊行邊食。而司機忽然保鑣上身，企喺櫃員機旁邊傍住老闆，一支煙時間剛好夠㩒完錢上埋車。
鄭中基趁住唔使開工，前日同老婆抱埋囡囡行街買餸。鄭中基借住㩒錢嘅時間百忙中抽咗支煙。
鄭中基即場上生物課，教囡囡分辨海鮮。
中基架七人車之後駛咗去北角碼頭，一行五人又再落車，中基抱住囡囡，難得囡囡冇嫌棄老竇一身煙味。中基一馬當先同老婆去咗何炳記海鮮檔，佢同海鮮檔周圍嘅人都有打招呼，睇嚟經常都有嚟幫襯。檔主仲攞起隻蝦畀Emma睇，佢人仔細細一啲都唔驚，老竇好耐心講解畀佢聽。不過聽咗一陣囡囡已經唔耐煩要落地行，Sammie就負責睇住囡囡，中基繼續買海鮮。最後佢哋揀咗魚蝦蟹，不過當發現有記者影相之後，就速速畀錢上車走人。事後海鮮檔店主話鄭中基係熟客：「鄭生成日嚟，今次都係買咗四千幾蚊，最靚係花尾斑。」
Emma非常活潑喺街市內跑嚟跑去，媽咪要全程傍實。
熟睡中俾人偷影嘅中基父女照，非常溫馨。
from:
http://hk.apple.nextmedia ... 130911/18417650
