一幀大隻佬照片，表面惹來艷羨目光，背後卻是不堪回首的地獄歷練。金像影帝張家輝在電影《激戰》為扮演拳手，過了九個月無味人生及運動員生涯，為的只是讓觀眾享受120分鐘的歡樂時光。他日前和導演林超賢，在黎智英（肥佬黎）和蔡瀾兩位主持面前詳談當日的辛酸，今次並非亂噏，那全是有血有淚為證。《亂噏24》足本版逢周四晚上11時播出，可在
http://bit.ly/appletalk24重溫。
撰文：馮國康、Sidekick
忘記當日滿身排骨的「化骨龍」吧！眼前的「賤輝」（《激戰》角色）雖然已比當日谷爆朱古力肌縮了一個碼，但隔着衣衫仍感到肌肉健碩，那是歲月磨練的象徵。肥佬黎很好奇問道：「練咗幾耐？」家輝沒直接回答，並輕輕帶出練大隻來演拳王，只是演員最基本修養，他說：「要觀眾信，我自己都覺得好難避免。作為一個拳手，苟且演咗佢，我又唔係好想。一係唔玩，一玩就玩大啲嘛！」一貫「化骨龍」式的腔調，便將整件事變得理所當然。
張家輝自爆早前去朋友派對，被灌醉後有很多隻手摸他。
攝影：何柏佳
「好多時都想放棄」
啞鈴隨身是常識吧！最折騰家輝的反而是他的非常「日常餐單」：「我呢九個月啲所謂餐單，就係將超級市場買嗰啲雞胸肉，一係蒸熟佢、一係烚熟佢，冇鹽冇油冇糖。食到後段已經食唔到，用啲冇味唔甜嘅豆奶，然後烚熟雞肉，揼落攪拌機度，整爛佢『飲肉』囉！」
雖說為理想便要有犧牲，這種非人生活並非人人做到，蔡瀾說：「開始都唔開始啦！」肥佬黎靜雞雞問家輝，可有想過中途放棄？家輝不諱言：「經常有！好多時都想放棄。放棄永遠都係最容易，肯留低面對硬食呢個問題，先係難。咁件事開動咗，唔通叫我前功盡廢咩！」林超賢忍不住踢爆家輝：「你中間偷偷走去隊碟牛肉算唔算放棄？」家輝手舞足蹈地說：「嬲㗎嘛！笠頂帽戴個口罩衝落去，嗌個清鍋、兩碟牛肉，係咁隊係咁隊到笠番頂帽上去就走，滿足到吖！」
肥佬黎認為家輝若不成功就是「天冇眼」。
「感覺好多隻手摸我」
張家輝練得一身肌肉，惹來男士妒忌，卻為他帶來不少煩惱，他憶述：「我記得去朋友party，有啲唔識嘅，佢哋成日灌醉我，我坐咗喺度好暈，但我感覺到好多隻手摸我！」肥佬黎問：「男手定女手先？」家輝答：「我都唔知，好似喺地鐵站俾人非禮咁！原來女人真係會對肌肉咁㗎喎，好鬼鹹濕嗰個原來係女人！」
《激戰》大部份場景都在澳門拍攝，林超賢笑說以為澳門「近近哋」，預算會便宜，怎料中伏，他說：「喺香港租架van仔千零蚊，嗰度要三千幾！」肥佬黎問：「賭場有冇sponsor？」不問猶自可，一問即擊中林的死穴，他訴苦：「冇呀！𠵱家澳門搵間房都坎坷，啲自由行多到。臨近11點，酒店『攀』我哋走！佢哋𠵱家唔志在，拍戲係乜吖！」的而且確，澳門經濟主要由賭場維持，收入更年年增加，解釋了為何當地學生一畢業便投身賭業。肥佬黎說：「𠵱家啲大陸佬落去賭錢，15分鐘可以輸3,000萬！」
近年家輝的電影作品，如《證人》、《綫人》、《大追捕》，題材都非常嚴肅，跟昔日在《賭俠1999》、《黑馬王子》的蠱惑調皮大相逕庭，然而不少觀眾跟筆者一樣，都想家輝做回搞笑角色。家輝說：「我自己唔抗拒搞笑片，如果又要我去用同一個pattern、同一個angle去做過咁多次嘅舊事情，我又唔覺得有衝動想去做。」蔡瀾笑問：「畀足錢你咪收囉？」家輝堅定答：「都唔得，錢唔係咁收法，啲錢咁收，袋唔穩。」蔡瀾和肥佬黎大讚有志氣。
不能抽離角色「真相」
肥佬黎試探家輝會否太入戲而不能抽離角色，他答得抵死：「好入戲出唔到，愛嚟媾女嗰時講嘅啫！出唔到？搵啲滾水淥吓佢囉！通常係啲八卦雜誌，佢同女主角俾人影到，就話抽離唔到呀。」眾人大笑，尤以老行尊蔡瀾笑得最響。
雖然家輝沒有抽離角色煩惱，但他也是香港少有實行方法演技的演員，他認為要令電影更吸引，少不免將真實程度提高，蔡瀾對他另眼相看：「佢已經係升咗一級啦，入咗角色先囉。有啲低層次啲，話我哋演呢個角色，咁呢啲人未諗通。」肥佬黎問他可會事先體驗拳手生活，家輝說：「有梗係最好啦，但做殺手，咁你點去（體驗）啫？」
【今年勁爆肌】
今年家輝這幀爆肌照曝光，令全城男士既羨且妒。
【前年黃蜂腰】
前年演出《大追捕》時狂練拳，練就一條黃蜂腰。
【01年肉騰騰】
家輝01年演出《殺手假期》時，仍有一大塊肚腩。
from:
http://hk.apple.nextmedia ... 130906/18410883
