張家輝一頭白髮嘅陀地look，加埋雙臂嘅紋身，好有煞氣。
張家輝第一部導演嘅戲《盂蘭神功》以驚嚇講鬼做賣點票房成績唔錯，嚇開有癮嘅佢又再以鬼世界包裝一套偵探片《陀地驅魔人》，擺明向老友導演彭順嘅《C+偵探》挑戰。
今次家輝繼續又演又導，日前喺鴨脷洲進行開鏡拜神後就順便開工，同場仲有舞台劇演員甄詠蓓同釋彥能等其他演員，有份演出嘅台灣藝人郭采潔就要稍後先至嚟香港開工。
家輝以一身陀地look現身，佢一頭白髮已經非常搶鏡，着咗長袖恤衫但刻意捲起衫袖，就係為咗要展現佢畫滿紋身嘅雙臂，搞到咁有煞氣事關佢喺戲中要演一名驅魔人。
張家輝今次邀得釋彥能（右）助陣。
雙臂印足十粒鐘
家輝透露為咗呢套新片半年前已經着手籌備，佢話呢身日本漫畫人物嘅造型，係出自美術指導奚仲文手筆，家輝話：「單係一雙手臂同頸以下部份見光位置，就花咗差唔多十粒鐘印上圖案，跟住每日開工都要預早啲時間去化妝加工，仲要戴埋大眼仔，營造眼神凌厲嘅感覺，真係全身都好yeah！」佢話今次為再做導演已經做好準備，所以再冇得賴同期要拍兩部戲，而令到部戲拍得唔好。
撰文：馮仁昭
馮仁昭
from:
http://hk.apple.nextmedia ... 150312/19072584
