林夏薇與洪永城因一套劇成為好友，上至感情事，下至《道德經》也無所不談，惟從未有過電感覺，洪直言不會越出朋友界線，建議夏薇主動出擊識男仔，但要先改掉集中力不足，一心多用的習慣，否則作為另一半很無癮，而夏薇亦坦言恨拍拖，但一切等待緣分降臨！
洪永城直言林夏薇對他不具吸引力，更教對方主動出擊識男仔。
熟到攬頭攬頸
林：第一次合作係同你拍劇集《單戀雙城》，本身都有睇你旅遊特輯，幾鍾意你嘅風格，公司撞到你又好nice，自然就熟起上嚟，之後都好多嘢傾，拍劇期間會一齊討論劇本，大家又住得近，收工可以一齊走，路上亦有研究角色應該點，唔知你有冇印象？
洪：係呀！應該咁講，我覺得大家磁場係幾夾，好似對朋友、處事方法都差唔多，你演戲經驗比我豐富，有時我做唔到個感覺，你會教我點做，我冇諗得咁深入，你就分析得好仔細。
林夏薇與洪永城性格南轅北轍，但欣賞對方直接又好人。
首度合作的林夏薇與洪永城，互相提點而變得老友。
林：都係畀吓意見，你個人冇乜嘢，係有時好直接，但都係一個好人同值得信任嘅人，亦都係因為太熟關係，所以係唔會有過電感覺，你認為呢？
洪永城願為愛情付出，但否認是大男人。
洪永城與黃翠如最近常以情侶檔出騷。
林夏薇講到眉飛色舞，而洪永城則非常冷靜，二人相映成趣。
洪：喺我字典入面，有啲人係好朋友，唔會越線，何況你都唔吸引我！我係冇咁多嘢講，不過可以一針見血，唔係好似你咁，講一大堆廢話只有一個字可取。
林：同你就好似好兄弟，呢個圈入面都好少可以攬頭攬頸嘅朋友，你係其中一個，你成日叫我拍拖，但去邊度搵啫！
智慧互相交流
林：除咗大男人，你都有特別之處，記得有次外景，我哋喺外景車講起《道德經》，平時都見你攞本筆記簿出嚟，將有意思句子抄低，我記得其中有一句係《道德經》內容，唔知公司同事會唔會覺得我哋當時傾偈內容奇怪呢？
洪：嗰次係我咁啱睇緊呢本書，其中有一節係話，做人要有智慧，生活上安排好之外，仲要識得睇人善與惡，呢個都係人生智慧嘅一種。
林：我都鍾意睇書，平時都會下載啲書睇，好似《三十六計》咁，啲人會覺得我睇埋啲咁奇怪嘢，最近就睇《人性的弱點》，內容唔一定要睇晒，書都係用嚟做參考。
鼓勵勇敢去愛
洪：相信每個女仔都要有愛情滋潤，人先會有朝氣，所以我不嬲都鼓勵身邊男女拍拖。
林：我發覺你都好受歡迎，有時出外景，都聽到啲師奶話好鍾意你，仲讚你把聲好sexy，我真係想嘔！
洪：哈哈！我感覺你對愛情有少少掣肘，每個人心入面都會恐懼試新嘢，但當踏出咗第一步，其實都可以好美好。
林：不嬲都敢試，但冇時間去遇，如果我拍緊拖，但要開工，男朋友係咁打嚟我會話佢，不過都相信緣分係擋唔到嘅，係你就係你。
洪：如果我真係鍾意一個女仔，我會願意為佢付出，愛情係要勇敢去愛。（有咩招數？）通常都用最唔花巧嘅嘢，都係普通食飯，叫佢先去我鍾意嘅地方了解佢，睇戲食飯唔會睇到個人係點。
林：你係一個大男人，又會控制個女仔，唔好睇你傻吓傻吓。
洪：唔係啦！我唔鍾意控制人，自己都未控制到自己。
林：我都欣賞性格有啲大男人，自己向來有選擇恐懼症。
缺點容易分心
洪：講開又講，不如講吓你缺點啦！你覺唔覺得你好易分心，傾緊偈會掛住做其他嘢，好似我話分手，你一邊打手機短訊，一邊hea答我！都幾hurt！
林：我個人係一心做好多嘢，我對你先係咁，同樣事唔會同其他人傾到咁深入。
洪：咁你係咪冇咗電話唔得嗰啲人?
林：電話真係好緊要，前排都發現自己有呢個問題，其實冇人搵你，但不自覺不停check，所以依家放假盡量唔開微訊，同鍾意離開香港，咁先叫做真係放假。
後記：熱情Vs冷靜
洪永城與林夏薇雖然話係磁場夾，但依筆者觀察短短的個多小時中，洪永城的紳士feel，對比夏薇的開朗性格，實質有點格格不入，如這邊廂夏薇滔滔不絕地說不停，甚至講到眉飛色舞，但洪永城一貫平淡腔，兩人相信亦難發展成情侶，如今能夠成為好友實屬難得！
from:
http://orientaldaily.on.c ... /00282_070.html
