現年51歲嘅杜德偉（Alex）舊年年底同任職攝影師、細佢24年嘅女友Ice Lee拉埋天窗，結婚到𠵱家差唔多一年，定居香港嘅佢哋依然恩愛，好似Alex相隔9年再喺台灣出唱片，呢排就要留喺當地一段時間做宣傳，而Ice好體貼，專登喺七夕節嘅前一日飛去台灣搵Alex，陪老公過呢個中國情人節。
Alex同老婆着到一黑一白拍拖食飯，襯到絕。
台灣《蘋果日報》
可能係食得太飽嘅關係，Alex食完飯出門口時都要鬆吓褲頭。
台灣《蘋果日報》
Alex同Ice喺上年年尾結婚，雖然年齡差一大截，但都無損恩愛。
資料圖片
兩公婆甜到漏
喺七夕之後嗰晚（14日），一身全黑潮人打扮嘅Ice等Alex完成當日嘅工作後，又齊齊喺國父紀念館附近拍拖食飯，雖然其間多咗位女友人做電燈膽，不過佢哋依舊甜到漏，點菜時Ice唔小心將其中一隻筷子掃咗落地，Alex二話不說就彎低身幫老婆執番，然後交畀餐廳員工換咗佢，而Ice就全程冧爆望實Alex，睇嚟對老公呢吓細心舉動好滿意。
離開餐廳時，唔知杜德偉係咪食得太飽，身材保持得好弗嘅佢都要稍微鬆一下褲頭，繼而拖實老婆隻手，同女友人一齊搭的士去到忠孝東路大樓，而喺大樓等𨋢時，Ice一見電梯門開就衝咗入去，不過就俾隻喺𨋢走出嚟嘅狗嚇親，仲退後咗幾步，Alex見到咁梗係好man咁扶實老婆，仲順勢攬住佢㖭！而有老公處處照顧嘅Ice見到狗狗行路時屁股擺吓擺吓都忍唔住笑咗出嚟！
from:
http://hk.apple.nextmedia ... 130818/18383358
