王秀琳（Mango）入行多年事業完全冇起色，但愛情方面就相當順景，除咗同天王郭富城傳過緋聞外，又同李彩華（Rain）舊愛潘啟翀（Derek）及多個有米男士拍過拖，身邊男士團團轉，又難怪被人叫集郵芒。
Mango同Derek拍拖幾個月後，好快就甩拖識咗第二個，今年4月本報曾經影到Mango有個勁有米嘅西裝友新歡，搵部462萬嘅勞斯萊斯接送Mango，原來Mango𠵱家仲同緊呢個新歡一齊。前晚記者見佢哋喺尖沙嘴行街，不過，兩個人全程前後腳行，拍拖都拍得好鬼祟。
跟甩男友
前晚6點半左右，戴住黑框眼鏡嘅Mango同西裝友喺海港城出現，男嗰個一支箭行咗去前面，Mango就隔住5、6個身位行，Mango基本上全程頭耷耷玩手機，間唔中先贒吓前面男友。佢哋行咗去LCX兜咗個圈，其間總算係行得比較埋一啲，大概10分鐘後兩個人冇乜心水，於是齊齊往廣東道方向離開，估唔到走嗰陣又隔開成丈遠，由於街上人頭湧湧，一路跟住男友嘅Mango跟跟吓竟然跟甩咗，要左搵右搵先至搵番男友，名副其實做跟得女友。最離奇係西裝友由頭到尾都冇回頭望Mango一眼，真係大男人！
西裝男友由頭到尾冇回頭望過Mango，相當大男人。
今年4月有米西裝男曾經搵部四百幾萬勞斯萊斯接送Mango。資料圖片
from:
http://hk.apple.nextmedia.com/entertainment/art/20130816/18380482
