林峯同吳千語拍咗拖一年，早就唔怕峰迷呷醋公開女友身份，尤其千語BB俾負面新聞狙擊時，林峯都處處呵護，日前再有報道指千語BB姣溝周柏豪，又話向林峯逼婚，搞到林峯傷心流下男兒淚，噚晚林峯再為女友站出來，同千語BB聯名發聲明否認感情有變，不過聲明亦露咗玄機，林峯仲未有咁快成家立室，千語BB仲要等下先。
林𥧌同千語BB拍拖後，對女友可謂千依百順。林𥧌曾被影到情到濃時摸千語ＢＢ個肚仔，但佢哋話未到談婚論嫁階段。資料圖片
未到結婚階段
聲明裏面話，林峯同千語BB係男女朋友正常交往，但未到談婚論嫁階段，所以一切逼婚、騙婚甚至逼婚不遂而引出嘅傳聞，都係無稽之談。佢哋又話兩個都好重視自己嘅事業，亦都財政獨立，所以一切包養、買樓、買車、附屬卡等虛構報道，都係冇根據。林峯同千語BB強調，佢哋嘅關係冇受種種不實報道影響，仲一直互相勉勵，所以一切激喊、哭訴等嘅報道，係好荒謬。
林峯同千語BB話對呢啲虛構同惡意中傷嘅報道感遺憾，亦呼籲大眾唔好以假當真，如果報道及評論令佢哋有任何損失，都保留法律追究權利，最後仲叫大家祝福佢哋㖭。
from:
http://hk.apple.nextmedia ... 130814/18377411
