喺有線過咗嚟無綫嘅黃翠如，呢期熱到爆，雖然《師父˙明白了》收視唔算太理想，但得到巨星發哥周潤發點名話翠如BB幾好，即刻人氣再升啦！
呢排翠如BB忙緊為新劇《愛我請留言》開工，上星期五（2日）下晝四點幾，翠如BB同好拍檔黃浩然，仲有個約六歲嘅小妹妹一齊喺灣仔星街拍外景，場戲好簡單，只係講浩然抱住小妹妹喺街度行，搭緊的士嘅翠如BB經過見到。
不過由於當日天氣唔穩定，間中會落雨，所以佢哋趁冇雨時好快拍咗一次，拍完翠如BB、浩然等一齊睇帶，咁啱又開始落雨，原本佢哋想停雨再拍，點知越落越勁，最後被迫收工，翠如BB就坐公司車走，浩然則自己揸車走，浩然見記者都友善揮手。
翠如BB同黃浩然、小妹妹拍完一個鏡頭後，齊齊細心看重播片段。
已經有兩個囝囝嘅黃浩然，抱起小妹妹做戲可謂駕輕就熟。
拍攝時天氣麻麻，又雨又汗，浩然要麻煩工作人員幫佢補妝。
傳接拍新片
翠如BB除咗忙拍無綫劇外，有傳佢會接拍驕陽電影公司嘅電影，因為驕陽係有線嘅姊妹公司，所以惹嚟網民一陣討論、揣測，啲網友仲話唔通翠如BB要離開無綫？不過前日問過翠如BB，佢話冇聽過公司要佢接拍呢套戲，所以應該係流料，大家可以繼續喺無綫睇到翠如BB喇！
版主：陳基征
攝影：朱志聰、徐錦池
新劇出街有發哥讚好，翠如BB梗係笑得開心啦。
翠如BB噚日拍坐的士戲，點知拍咗一次就落雨，被迫收工。
翠如BB拍完戲落的士有工作人員幫佢擔遮，避免整花個妝。
from:
http://hk.apple.nextmedia ... 130806/18365194
