梁漢文（梁炳）老婆林文慧（Karen）兩年前患乳癌，最後兩夫妻齊心打咗場漂亮勝仗，老婆亦都康復過番正常生活，仲經常出雙入對拍拖。前日下晝3點幾，梁炳又同Karen出動，開車去咗中環開餐。早幾日先喺中環違例泊車俾人抄牌嘅梁炳，再次明知故犯，就咁泊架車喺士丹利街街邊，然後行咗去食越南河粉。飽餐完佢哋行返車攞背囊，其間Karen發現有記者影相，兩公婆擔住遮邊行嘅同時，成日擰轉面睇實記者嘅動向，跟住佢哋上咗幢商業大廈撇甩記者。
前日下晝梁漢文同老婆Karen喺中環行街，兩人不時四圍望。梁漢文為老婆擔遮，果然風雨同路。
差不多一杯接一杯嘅梁漢文，前後飲咗成半支紅酒。
玩手機自娛
不過傍晚7點鐘喺灣仔又發現梁炳兩公婆，佢哋去咗永豐街一間酒吧餐廳同一男一女友人會合。佢哋四個人面向牆平排而坐，坐喺最邊位嘅梁炳同嗰兩位朋友睇嚟唔係好熟，見佢不停灌紅酒又成日喺度玩手機，好少搭嘴傾偈，無聊起上嚟仲用拳頭打牆，行為古怪。飲到差唔多8點，梁炳大大話都飲咗成半支紅酒，呢個時候一位長髮女子嚟到會合。一班人打完招呼之後，長髮女子企喺梁炳後面用雙手按住佢背脊，不過梁炳一於少理繼續自隊。飲到大概8點半佢哋一行五人離開，全部上晒飲完酒照揸車嘅梁炳架寶馬走人，原來梁炳兩公婆去紅館睇陳奕迅嘅尾場演唱會。
Karen同朋友傾偈，梁漢文惟有耷頭玩手機。
梁漢文夫婦同朋友飲完酒即刻趕去欣賞Eason個唱。
from:
http://hk.apple.nextmedia ... 130804/18362861
