陳智燊同宋熙年拍拖多年感情穩定，經常糖黐豆黐到實。
今年三十七歲嘅筍盤陳智燊，上年公開同細佢八年嘅宋熙年拍拖後，已經正式封盤，佢仲講明三年後會娶女友過門，擺明向宋熙年派定心丸。前日唔使開工嘅陳智燊，又拖女友出巡晒幸福，大約四點鐘，兩個人手拖手喺銅鑼灣出現，最初都有一個男性友人同行，唔知係咪佢哋太冤氣，男友人行咗一陣就走咗，反而佢兩個就繼續細聲講大聲笑，旁若無人。
陳智燊同宋熙年前日拍拖買餐具，全程由女友話晒事。
進駐男友家
其實喺二○○九年已經有網民撞見陳智燊同宋熙年拖手行街，當時仲話陳智燊知道有人認得佢，即刻鬆開宋熙年隻手。到上年宋熙年生日，將自己同陳智燊合照放上網，戀情先正式公開，最近仲有傳宋熙年為睇實陳智燊，已經進駐男友將軍澳屋企。而兩人前日行街，途經一間家品店時，宋熙年又的確好雀躍，即刻走入去揀杯碟，最後揀咗十五分鐘就有收穫，離開時陳智燊仲好醒目發現記者影相，不過戀情已經公開咗，佢今次當然冇甩開女友隻手，仲拖到實一實㖭！
撰文：馮仁昭
馮仁昭
from:
http://hk.apple.nextmedia ... 150311/19071016
