謝霆鋒和周迅因同樣鍾意rock music而撻着，女方更搬來港黐實男友。身為霆鋒老友的容祖兒及蔡卓妍前晚到中環出席Yahoo頒獎禮，被問到對「迅鋒戀」是否知情，兩人雖異口同聲表示不知，但卻露出蠱惑笑容似有所指。
穿上露背晚裝的祖兒，贊成老友霆鋒拍拖。
談到「迅鋒戀」，阿Sa坦言：「唔知真定假，不過我都好鍾意周迅，私下真係幻想過呢個組合拍拖，我都唔知點解會咁諗，佢哋都郎才女貌。」她表示以往初見周迅時很緊張，不敢開口要求合照。阿Sa又自言不敢問霆鋒，因怕被他寸。
阿Sa坦言以前已幻想過周迅和霆鋒拍拖。
「佢鍾意北京腔」
問祖兒有否向霆鋒八卦新戀情，她即狂笑說：「冇喎，我笑容冇嘢，乜都唔知，亦冇八，不過贊成佢拍拖，佢咁好條件，但係邊個就唔知。」有否感覺到霆鋒有愛情滋潤？祖兒稱他沒特別不同。至於阿Sa稱有幻想兩人拍拖，祖兒又若有所指說：「咁佢鍾意國語北京腔，我識周迅同見過，近日都有見。」記者即問是否在霆鋒公司或屋企，祖兒即尷尬說：「唔係，喺報紙啫。」
昨日有消息指霆鋒和周迅撻着，雙方公司要求他們低調，戀情曝光後公司惟有代為否認。雙方公司認為因「迅鋒戀」牽連甚廣，有機會連帶影響他們的舊愛及形象，所以要求霆鋒和周迅低調處理。據悉霆鋒知道戀情將被踢爆，遂於前日報道曝光的前一晚漏夜由栢舍搬往寶雲道新居，但此舉反予人「此地無銀」的感覺。
from:
http://hk.apple.nextmedia ... 130801/18358106
