無綫搞咗個藝員玩嘅歌唱比賽《星夢傳奇》，播咗幾集就彈出咗個好唱得嘅鄭俊弘，人氣三級跳成為演藝事業上嘅首個高峰，唔怪得吸引唔少未出頭嘅藝員參加。但贏就話好啫，好似當日俾高層欽點唔使面試就可以參加比賽嘅梁烈唯（唯唯），就因為唱得麻麻，唔止俾評判勁彈，最終被out埋，贏唔出仲要俾人踩，都好辳㗎！
唯唯否認媾苟芸慧
TVB高層原本個如意算盤係想催谷上緊位藝員，但見唯唯呢個算盤打唔響，唔知會唔會再諗其他計仔，不過聽聞原本有份被欽點參加嘅藝員，𠵱家都心大心細！據聞胡定欣同蕭正楠已經有意打退堂鼓唔玩，因為信心唔大未必贏梗，加上有個唱到爆晒燈嘅鄭俊弘喺度，只怕歌藝俾評判彈又輸埋，搞到好似唯唯咁俾人笑就唔好，所以佢哋都藉詞話要拍劇冇時間唔玩住，實行拖得就拖。
胡定欣噚日喺電話中承認唔玩：「因為冇期，所以參加唔到，我拍緊劇集《貓屎媽媽》埋尾，跟住又拍《飛虎II》。如果要出賽，我覺得要準備。」佢話冇得玩唔會失望，亦想無綫開新一輯。
唯唯唔止喺《星夢》輸咗，噚日仲要有消息話佢因為暗媾苟芸慧同羅彩玲（Vivian），結果搞到同未婚妻Tina嘅婚事叫停，真係一波接一波。不過唯唯同Tina噚日已喺微博留言否認，其中唯唯話：「嘩，一起床就看到這麼精彩的故事……但可否把書中所寫，我的那370多萬，至少分一半給我？」Tina亦有留言笑稱：「哈哈哈哈。太能寫了。」
梁烈唯早前喺《星夢傳奇》輸咗仲俾人喪彈，成個炮灰擺喺眼前，難怪蕭正楠同胡定欣唔玩啦！
蕭正楠同胡定欣見勢色唔對路，縮沙都好正常嘅。
from:
http://hk.apple.nextmedia ... 130726/18349412
