呢排無綫劇《衝上雲霄II》熱爆，除咗「Cool魔」張智霖同「Sam哥」吳鎮宇鬥型之外，胡杏兒着住小背心運動top喺街跑步嗰場戲都幾養眼「吸睛」。啱啱拍完《巾幗梟雄之諜血長天》嘅杏兒接住又飛咗去北京拍內地劇《如果不曾愛你》，遲啲仲要去內蒙拍外景，想返嚟幫手宣傳都唔得。
有新鮮感
雖然劇接劇，但杏兒又已經預咗11月個檔期再返無綫，到時會同羅仲謙齊齊拍潘嘉德嘅新劇《醋娘子》（暫名），其實之前有傳呢個劇嘅男主角係搵杏兒舊愛黃宗澤（Bosco），唔通真係咁大整蠱？喺北京嘅杏兒就話冇聽過：「冇聽過搵佢做喎，一直都聽係搵謙仔。」對於謙仔呢個新拍檔，杏兒都話有新鮮感，又大讚謙仔：「同佢一齊出席過活動，覺得佢幾cute，又好nice，希望合作愉快啦！」
做得男女主角，難免有親熱戲份，謙仔係杏兒好姊妹楊怡嘅男人，咁拍起上嚟咪好尷尬囉？杏兒笑言：「應該都冇乜嘢嘅，就算有，大家都係專業演員，冇嘢嘅！」不過到時楊怡得閒應該會頻頻探班，唔係監場，係嚟探男友同好姊妹，一次過探晒兩個，雙倍開心！
版主：陳基征
胡杏兒同羅仲謙11月會合演無綫新劇，唔知楊怡到時會唔會嚟探班？
楊怡同羅仲謙係公認嘅一對，探班都好正常。有傳胡杏兒即將拍嘅新劇再同舊愛黃宗澤合作，不過杏兒話冇聽過。
from:
http://hk.apple.nextmedia ... 130723/18344645
