皇牌遊戲節目《Running Man》唔只韓國超旺，節目喺香港亦勁受歡迎。上週主持人金鐘國、哈哈、Gary及池石鎮4人終於大軍壓港，先踩入旺角朗豪坊搞簽名會，再到亞洲博覽館舉行fans見面會。
一出場，RM 4子先以「Mark哥」造型唱出哥哥經典歌〈當年情〉向港女派糖。為跟港迷互動，RM更即場抽出觀眾上台玩遊戲，不過玩遊戲事小，反而親近偶像先最重要，個個女fans唔執輸扭抱攬到夠本。去到見面會中段，啱啱做老豆嘅哈哈竟然向大隻佬金鐘國上下其手，胸襲兼偷桃。不過全晚最精采一定係金鐘國玩濕身，臨完場賣大包透點飛釘又唱又跳，全場4千歌迷癲晒，下次乾脆除埋衫咪仲high！
RM嘅香港fans meeting開足2個半鐘，高潮位就係完騷前大隻佬金鐘國同隊員哈哈合唱〈可愛〉時，被哈哈淋濕全身，搞到40吋巨胸現晒形，仲透埋點，難怪全場港女叫到癲！
全晚RM 4子多次抽出現場觀眾玩遊戲，就算贏或輸都可獲得4子送出嘅紀念品，但女fans攞完獎品後仲要求同偶像抱抱，一於抽水抽到盡。
胸襲偷桃RM 4子中，以哈哈最百厭，全晚不停扯大隻佬件衫想佢當眾剝衫不特止，更上下其手從後胸襲兼偷桃，裝出enjoy樣，搞到金鐘國都怕咗佢。
娘爆大叔來港嘅RM 4子中，原本47歲大叔池石鎮不及另外3個隊友咁受歡迎，但玩完遊戲後，佢用廣東話唱出陳奕迅嘅〈重口味〉。發音怪怪哋，甩嘴甩到尾，加上件珠片衫娘到爆，但勝在騎呢搞笑，卒之俾佢成功搶鏡。
4子撐場上週六（13日），RM 4子開騷前，曾到旺角朗豪坊舉行簽名會，吸引過千粉絲圍觀，場面墟冚。其實《Running Man》節目總共有7個主持，但因大隊長劉在石要留在韓國主持其他節目，而李光洙及女主持宋智孝分別趕拍韓劇《火之女神井兒》及《天命》，所以嚟唔到香港，如果嚟埋，肯定迫爆朗豪坊。
宋智孝
劉在石
李光洙
