自從黄翠如上年過檔TVB後，愈撈愈掂，處女劇《心路GPS》中同司棋姐齊齊擔正，純女形象極速被封為高登新紮「女神」。
輪到今週開播的新劇《師父．明白了》，聽劇名以為係一貫古裝娘爆喜劇，實情係苦情悲劇，仲有以蝴蝶穿插睇穿前世因果橋段，似足03年劉德華套電影《大隻佬》。今次無綫玩古裝cult劇，要與《衝上雲霄II》同日出街，翠如BB有信心之餘，仲話：「未必輸俾《衝Ⅱ》㗎。」
31歲黄翠如過檔無綫後，上一套《心路GPS》玩老套勵志，新劇《師父．明白了》劇名就膠味濃，但原來係套破格古裝cult劇，女一翠如BB更要慘死。
《師》劇用黄翠如搭黄浩然做主角，呢pair組合算有新鮮感。
《師》劇同重頭劇《衝Ⅱ》撞正，雖然黄翠如話唔擔心收視，但佢坦言希望大家睇完《衝Ⅱ》睇埋佢喎。
翠如BB遲嚟先上岸，入無綫唔夠一年便有《舌尖上的公堂》、《愛我請留言》等劇，仲有同洪永城加碼的《走過浮華大地》。《蘋果日報》圖片
師奶睇得明除咗翠如BB扮慘，《師》劇更加係TVB少有破格cult片，講前世今生已經夠難明，套劇仲要不分時代，古裝劇卻出現如「肥嘢」等現代對白；加上撞正重頭劇《衝上雲霄Ⅱ》同期播出，翠如BB直言好緊張，佢話：「套劇唔同之前啲劇集，cult cult哋但又冇《天與地》咁難明，師奶應該睇得明。故事係講宿命、因果關係，今日做啲嘢，係會影響明日嘅結局。」
雖然套劇另類，但據知黃翠如在《師》劇演出令無綫高層曾勵珍有驚喜，知情者說：「珍姐睇咗佢（黃翠如）喺《師父》嘅表現好like佢，專登喺8月開套新劇《愛我請留言》俾佢擔正，再同黃浩然做情侶。」玩另類掂咗，翠如BB有排撈啦！
《師父．明白了》冇設定年代背景，又勁講現代對白，好似麥包在劇中就叫「肥嘢」，對白又古又今，希望唔會再出現「幫朕check吓！」
今次故事黃浩然與黃翠如最後都會死，黃翠如形容角色係悲劇人物，令佢一次過喊晒多年來的眼淚。
劇中麥包每逢見到蝴蝶就可以洞悉天機，而劉德華在《大隻佬》中亦有類似特異功能。
另類劇仆
《天與地》
講夾band夾到食人，又發表「和諧論」，玩埋平行時空，雖然平均收視只得25點，但mytv多點擊，被年輕網民封為「神劇」。
《神探高倫布》
玩穿越時空，馬賽同黎耀祥的忘年戀，本身已唔多討好，但最趕客係馬賽叫「布布」，觀眾大感煩厭，收視低見20點。
《金枝慾孽Ⅱ》
今次再玩平行時空外，另加插夢中夢及斷背情，不過金枝迷唔多buy，結局週平均收視得20點。
