無綫為挽救跌唔停收視，早前重金禮聘福將黃子華回巢，拍住兩大姐仔徐子珊、陳敏之參演新劇《My盛Lady》。
以為坐定粒六做女一的徐子珊，開戲後先發現陳敏之戲份愈加愈多，甚至同黃子華對手戲多過自己一截。
上週劇組分別在油塘及西環拍外景，徐子珊明擺一姐款，對陳敏之不瞅不睬，只有黐住黃子華，才變面有講有笑。
明益愛將
深得監製文偉鴻歡心的陳敏之，在新劇《My盛Lady》中分別同黃子華及阮兆祥有感情線，大玩三角戀，戲份比徐子珊有過之而無不及。
「阿Jazz（文偉鴻）之前喺第一集《怒火》同《法網狙擊》做導演同監製，已經好錫敏之，兩套劇角色都係為佢度身訂造！今次仲要由醜女變靚女，好有發揮，監製加咗好多同子華嘅對手戲俾佢，出街嗰陣一定搶晒鏡。」一名《My盛》幕後人員說。
冇監製錫，徐子珊轉攻黐實黃子華，甚至出動私家保母車，接送對方出入片場。
「子珊喺片場好黐子華，無論平時出外景，抑或喺電視城化妝，子珊次次都主動話車埋子華，叫佢唔使坐劇組車。」幕後人員續說。
黃子華與陳敏之拍攝嘴戲，監製講明唔准借位，二人亦交足功課，嘴足四次導演才收貨。
被黃子華強吻，敏之用力爭扎反抗，再送上「兜巴星」。
等埋位，徐子珊不斷跟黃子華雞啄唔斷，被杯葛的敏之坐埋一邊做獨家村。
全晚徐子珊的戲份只是行行企企，唯有坐埋一邊㩒電話解悶。
陳敏之在第一輯《怒火街頭》中，憑「索腿天后」貞貞出位，當年出任該劇導演的文偉鴻，亦居功不少。
有你無我
上週四（廿七日），劇組連踩十二粒鐘拍外景，下午兩點，黃子華及徐子珊到達油塘商場，子華見未埋位，於是走入咖啡店休息，子珊二仔底死跟，更挨實子華吹水。未幾，陳敏之坐低搭枱，徐子珊即扁嘴起身走人，無癮敏之唯有拎塊鏡補妝，淡化尷尬場面。
有你無我，之後敏之被召埋位，子珊即刻返入咖啡店，同黃子華、阮兆祥等人繼續吹水，擺明杯葛陳敏之。
至晚上八點，劇組移師至上環林士街取景，拍攝黃子華強吻陳敏之被兜巴星戲份。徐子珊當晚負責做路人甲，全程行行企企，唯有面燶燶坐埋一邊篤電話，直至記者要求三人合照，徐子珊才勉強擠出笑容配合。原本以為執到好籌，可以拍住收視福將黃子華拍劇，最後卻由女一變花瓶，難怪子珊條氣唔順到出面。
原本挨住黃子華有講有笑的徐子珊，一見陳敏之坐底即刻彈起身行開。
32度高溫下拍外景，黃子華除下戲服，匿埋一邊做運動，其間露出手臂上的紋身。
新劇中，陳敏之又要扮醜女，又要泳衣上陣，搏到盡。
早有積怨
09年，陳敏之和徐子珊拍攝劇集《美麗高解像》時，已有積怨。其中一場戲講述陳敏之掌摑徐子珊，拍之前導演講明「嚟真」，希望一take過，拍完後，徐子珊即刻怒目陳敏之，更嗌停機要敷冰。其後有傳媒報導話陳敏之夾埋伍詠薇、苑瓊丹等「八婆團」聯手整蠱徐子珊，令她硬食幾十巴。新聞出街後，即惹怒陳敏之及伍姑娘等，指徐子珊放流料搏同情。
