今晚播最後一集的無綫真人騷《求愛大作戰》是非多籮籮，繼日前Vivien由正面向Justin騎膊馬超重口味後，形象負面的Vivien昨爆大鑊，力數《求愛》造假！她一早認識Justin，但被無綫力阻向外透露，又稱為提高收視而做戲示愛。自認豬嘜的她哭訴遭無綫擺上枱：「呢班唔係一班好人。」
連日來《求愛大作戰》中，盛女Vivien為求爭奪Justin而出盡法寶，醜行表露無遺，大前晚一集中，她竟要求正面對住Justin騎膊馬，令下體對正男方的面龐，加上被指大話精向外聲稱自己與Justin拍拖，結果遭網民喪插！Vivien不忿被鬧爆及被一班盛男夾計玩殘，前晚主動聯絡記者為自己辯護：「我跟本冇鍾意Justin，我話父母讚佢係假，父母見完佢都反對我哋發展，佢哋班男仔我一個都唔吼，我另有男友。」為何所言跟幕前相反？她說：「我好戲囉，好多係導師鼓勵我講，接拍節目我簽咗份協議，無論點都要拍到底，我承認為交戲玩大咗，當初我係貪慕虛榮，想借呢個節目提升知名度。你哋可以寫我係豬嘜又幼稚。」
Vivien月初還大方出席《求愛大作戰》活動，但自近日遭觀眾鬧爆後，已不再亮相相關宣傳。Vivien不忿被無綫擺上枱，前晚透過微信大爆一切是個局。
「啲遊戲好變態」
Vivien直斥龍目島的遊戲令人難堪尷尬，她續說：「啲遊戲好變態、好無聊、好低俗，我只不過應承同佢（Justin）做螢幕情侶，佢哋利用咗我嘅善良，我唔介意佢哋背後講我，佢哋知道收視唔得，所以利用我繼續炒作，全程有人攻心計，我發誓我唔係咁！人在造、天在看，正因為咁我拒絕出席佢哋呢輪任何活動。」
據知，Vivien稱曾要求無綫不要出騎膊馬片段，記者昨日再致電Vivien時，她直認不諱：「係呀。我係同人生教練講，人生教練同TVB講。好彩有幾個朋友撐住我，如果唔係我一早死咗。佢哋真係太過份！」誰太過份？她說：「TVB囉。」講到當日正面騎膊馬，她解釋：「喺後面騎上去，我畏高會驚，成個人撻落嚟咪有生命危險？我話可唔可以正面爬上去好啲？起碼我可以叉住你膊頭，佢（Justin）話唔得，咁即係要我硬食，佢人品有問題。雖然我哋私底下識咗幾年，但佢唔理我感受，所以我從此好少參加佢哋個party，想遠離呢班人，呢班唔係一班好人。」她自爆一早由朋友介紹認識Justin，但無綫要求她不要向外透露。
「俾人玩咗一鑊」
Vivien忍不住飲泣：「佢哋有心玩我同Sharon，到（龍目島）第三日我真係唔想玩……我喺間房度話要退出，喊晒，佢哋話個騷會爛尾，唔知TVB會點整你，TVB啲高層好小器㗎！我覺得俾人玩咗一鑊，我諗住做螢幕情侶，點解咁認真啫？為咗營造效果，我梗係要做啲嘢㗎啦。」她指Justin曾與自己父母見面，並送上小禮物給母親。是否後悔參加節目？她說：「幾後悔，但學到嘢囉。我冇害人啫，起碼我心地善良，唔用計謀。」對於Vivien的指控，《求愛》編導岑應昨回應說：「佢情緒比較激動，佢有講過要告介紹佢參加呢個比賽嘅人。」對於節目被指造假，岑應說：「冇得假，我哋如實報道。」
《求愛大作戰》前晚拉隊到旺角食雞煲，但Vivien與Justin均未有出現。Justin不但與其他盛男夾計玩Vivien，還在前晚節目中數臭女方。
from:
http://hk.apple.nextmedia ... 130628/18314641
