噚晚一集《求愛大作戰》，嚟個叫做「dating in the dark」嘅環節，首先預備一間黑房俾女參賽者坐晒喺度，然後每位男士都單獨入去，俾班女士問問題，話係要撇除外表因素，唔知點解，香港女士咁鍾意問人咩星座？難道世界上的人只有12種性格？
然後開燈啦，如網民所想，亦如觀眾所想，一班女士肯定係嫌棄樣出晒面，唔係邊有話題呢？首先ABC Vincent其實都四四正正，片段都形容佢為「白馬王子」，但出到來，其中一位女參賽者文員Sharon，竟然話佢「岩岩巉巉」似礦工，有冇咁差呀？
然後好多男士著格仔衫，班女士又話格仔衫似足典型宅男，又叫人轉個圈行cat walk，有網民都鬧爆:「又要轉個圈，又要cat walk，係搵男朋友定係搵隻狗？」然後又話班男士係奇珍異獸…總之就又嫌人老又醜之類…見到靚仔又嗒糖，直認自己睇樣好膚淺。
《求愛大作戰》，又成功掀起話題啦。
金句如下:
1.一著燈係，吓？求愛？呢班？個樣咁岩巉？
2.今日仲乜咁多人著格仔衫0架，宅男嘅特徵。
3.咩夢想都幻滅晒囉，即係可能原本以為你係白馬王子(獵頭公司高層Vincent)，出到嚟原來係一個礦工，仲要係岩巉樣嘅礦工。
4.Rocky(財務策劃師)佢好經典，我很醜但是我很溫柔嗰啲。
5.我好膚淺，睇個樣0架咋。
其實，無綫冇理由未受過上次《盛女大作戰》嘅教訓，知道乜嘢會俾人鬧，但愈多人鬧，即係多人睇，所以呢啲「戲劇效果」係真係假，大概都估到。
不過最討厭港女嘅高登鬧爆班女參賽者係預料之內啦，最出奇係Baby Kingdom嘅師奶都一樣鬧爆一班女士，話佢哋影衰港女，但仍然都有觀眾心水清，覺得只係為谷收視而造出嚟嘅話題。
《求愛》港女Sharon被起底自貼嚇人床照
好嘞，噚晚睇完《求愛大作戰》，唔知有冇鬧爆港女Sharon呢？鬧還鬧，底都係要起的。講到男人一文不值，但今日就有報道幫佢大起底，話佢喺一個交友網站入面，頻頻自貼嚇人床照，仲寫明想搵完美男人，同成為有錢同成功嘅女人，白啲講，即係釣金龜。但有人笑佢兩眼分得太開，講唔上個「索」字。
前兩日Sharon出嚟宣傳見人時，唔止對眼「擘髀走」，仲爆晒瘡…想釣金龜似乎有小小難度…不過又唔好話，《求愛》入面佢講到明自己有公主病，但「故事發展」落去，佢同同樣自認係富二代兼有公主病嘅Vivien竟然係最多人約嘅兩位，Sharon仲成為票后三甲。有報道話佢沾沾自喜同朋友講：「呢班男仔，我三兩下招數都冧掂佢哋。」所以邊個話港女冇市場呢？
報道仲話，做文員嘅Sharon，平日就鍾意約埋班姊妹去酒吧獵艷，因為份人open所以每次都有斬穫，但又次次因為性格難頂而被飛。
而自稱富二代嘅Vivien，成日吹自己好有錢，講到好似屋企人開石油公司，但據知只係親戚喺石油公司做高層，不過老竇就係深圳公安高層。而個樣好乖乖女，幾得網民歡心嘅Whitney，開頭竟然無人問津，後來先成為票后，但原來Whitney已經有男友及追求者，參加節目唔通都係想釣金龜?
做時裝採購的Carol，經常私影，影三點式都冇所謂。Sharon呢張相，得唔得?（互聯網圖片）
情深款款望住….唔知男士有冇心動?Sharon塊面爆晒瘡…..呢排壓力大?
