分手情侶可以好來好去例子唔多，睇滕麗名同魏駿傑互爆陰毒，就知！同樣已成過去式嘅黃宗澤胡杏兒，兩個就算冇偈傾，提起對方起碼會客客氣氣。
上個禮拜二（六月十一日），無綫新劇《好心作怪》响將軍澳搞宣傳活動，三哥苗僑偉、萬綺雯、周麗淇都冇現身，靠黃宗澤一個頂晒，佢忍唔住講：「如果三哥下次仲唔出嚟，就罰佢著三角泳褲。」
講三哥是但噏，當記者講到今屆有參選港姐似胡杏兒，黃宗澤一樣唔收口：「咁咪靚囉，一定大熱，我貼呢個，得啦，大家（指記者）有嘢寫啦！」
舊愛都照撐，至於單身大半年嘅胡杏兒，把口話唔急拍拖，但上星期五（十四日）幫公司宣傳暑期節目，一聽到陳豪陳茵媺雙喜臨門，羨慕到出口：「預祝佢哋生番個肥肥白白嘅BB啦！（幾時到你？）呢啲可遇不可求，不過我去邊度結婚都冇所謂，最緊要開心！」咁又係，最緊要另一半唔會沙沙滾啫！
自從陳豪筍盤沽出，有調查指黃宗澤僅次馬國明，成為無綫第二大筍盤，但佢對舊愛，依然講盡好話。
繼上次幫公司宣傳世界盃，被迫同黃宗澤排排企，今次胡杏兒又被整蠱，同舊愛新緋聞女友林穎彤（箭嘴）同場，搞到胡杏兒做完活動即走，怕記者捉住問長問短。
未有拖拍，胡杏兒見到陳豪陳茵媺雙喜臨門，表現羨慕。
餵女fans食嘢，黃宗澤盡量避免近距離接觸，男fans例外，會幫佢抹埋嘴。
男女有別呢日翟威廉同呂慧儀幫公司宣傳暑假節目，前者响後台大大聲企响記者身邊講手提電話，可惜冇人八卦佢講乜，但騷長腿兼騷埋貓爪痕嘅呂慧儀，就有唔少人問候傷勢。
