莊思敏、李綺雯（𡃁妹）、姚子羚、林盛斌（Bob）同郭田葰等日前去咗長隆拍無綫節目《反斗紅星放暑假》，寓工作於娛樂，鏡頭前後個個都玩到癲晒，game騷鐵膽莊思敏（Jacquelin）話：「今次第三次去長隆，但次次人腳都唔同，所以每一次都好好玩，成班人玩到癲晒。」
Jacquelin透露玩咗多款唔同水上遊戲，佢同郭田葰、阿Bob、姚子羚同𡃁妹李綺雯仲玩到濕晒身㖭，好鬼瘋狂。見佢哋幾個女仔喺鏡頭前，個個都泳衣加背心，似乎唔夠清涼喎，Jacquelin話：「始終係合家歡節目，而且為咗保障大家安全，所以咪着多啲衫。」
莊思敏鏡頭後當然把握機會，晒一晒事業線。難得有莊思敏（左）同𡃁妹相伴拍床照，阿Bob一副慘樣，認真搞笑。
搶救阿Bob
不過，喺其中測試男藝人體能嘅遊戲中，發生咗小插曲，Jacquelin話：「阿Bob同郭田葰要搬啲大水泡上幾層樓，中途見到阿Bob跑到喘晒氣，塊面青晒，好似想死咁，搞到大家都勁驚。」係咪驚要同佢做人工呼吸呀？佢話：「如果係嘅話，都希望可以救佢一命，可以救到佢都會。」提到形象指導「綠魔」Karl近期成為熱門話題，扮嘢扮上癮嘅阿Bob當然唔放過呢個機會，學佢晒長腿，又搞笑同Jacquelin及𡃁妹影床照，可惜Jacquelin話：「我覺得綠魔靚啲，佢保養應該好過阿Bob！」
𡃁妹李綺雯同莊思敏喺節目中攞正牌玩到癲。阿Bob（右一）扮「綠魔」晒腿，但論養眼又點比得上姚子羚（左一）。
from:
http://hk.apple.nextmedia.com/entertainment/art/20130620/18304625
