張家輝處男執導嘅鬼片《盂蘭神功》，近日喺馬來西亞吉隆坡取景，噚日張家輝、劉心悠同吳家麗喺戲棚舉行開鏡儀式，仲大放炮仗，家輝驚到手震，心悠同吳家麗就嚇到雞飛狗走。家輝話今次好順利，做導演後發覺要尊重演員，不過自己做演員就比較反叛同唔聽話，佢話今次拍鬼片都疑神疑鬼，前晚拍一場放火燒戲棚戲，見到個特技演員坐埋一邊，以為佢有乜事，原來只係吸入過多濃煙，家輝又否認之前轉酒店係因為鬧鬼。
張家輝首次同吳家麗合作，大讚喺女方身上學咗好多嘢。張家輝拎住香點炮仗，嚇到劉心悠雞飛狗走。
心悠拒做女神
近日有報章解構家輝地獄式操肌會傷腎，佢話只係為任務咁做，問佢係咪要戒色？佢話：「點解要追問我呢啲問題，冇影響我日常生活。」家輝又話唔介意俾網友將相惡搞key咗阿Bob個頭。劉心悠喺戲中扮粵劇老師，講到家輝被讚男神，佢被封係女神，心悠即話：「我唔係女神，我係人類，我都好好奇佢嘅朱古力，自己都想整。」另外，吳家麗前晚化大戲妝開工，家輝到場送花答謝佢幫忙。
from:
http://hk.apple.nextmedia.com/entertainment/art/20130612/18293913
