周麗淇（Niki）重返電視圈愈撈愈掂，今個禮拜無綫推佢部《好心作怪》救收視，嚟緊Niki又加入「掘人仔團」，北上參演梅小青同劉家豪夫妻加盟now後嘅頭炮重頭劇《大漢賢后衞子夫》，同林峯合演男女主角。
Niki同劉家豪夫婦關係一直都好好，所以劉氏夫婦過檔開新劇，第一個就鎖定Niki做「女一」喇！
早排Niki到橫店為《大》試造型，途中發生「生死時速20秒」，將佢嚇到半死。所謂大難不死必有後福，上週有報道指同劇嘅林峯有千萬報酬，而Niki雖然冇正面講賺幾多，但就坦白話夠買樓。FBI收到風《大》劇監製劉家豪開劇前，就鎖定搵Niki做女主角第一人選，事關Niki 05年與劉監製合作嘅《秀才遇着兵》當年收視大收旺場，加上覺得Niki與林峯外形合襯，出嚟實有新鮮感，所以今次講明要搵Niki做女一，更出價15萬一集「人仔」。內地電視劇套套都咁長，睇嚟Niki好快買到豪宅喇。
