入行超過兩年的吳千語，自從成為林峯公開認可的BB後，人氣以光速急升，千語BB與峯峯三度甜蜜外遊，男方反常高調示愛，峯嫂地位穩如泰山；但與此同時，吳千語「拜金女」灌頂，被指屈男友送手袋送車又供住的她，終於出聲！
爸爸做飲食戀上林峯的吳千語，雖然得到峯寵，但同時也備受各方攻擊，尤其是金錢方面，指她常屈男友送名牌袋、名牌衫、名車等罪名。
六月一日（上週六），吳千語出席公開活動，對被指為「拜金女」，只得十九歲的她回應出奇地成熟。
壹：有報導話你喺沙角邨大，又話你爸爸喺屋邨斬叉燒，同林峯拍拖就等於飛上枝頭變鳳凰，你自己點睇？
吳：我屋企唔係大富之家，細細個嘅時候，爸爸係同親戚做飲食生意，係個正常家庭，並唔係報導所講咁坎坷。
壹：咁你係唔係住過沙角邨？
吳：好細個嘅時候喺沙角邨住過幾個月，因為父母經常唔喺香港，所以俾錢一個阿姨照顧我，自己都差啲唔記得。可能中學時候喺大圍返學，有去附近地方，因為咁有人誤會我住沙角邨。
年僅十九的吳千語，比同齡的女孩早熟，故面對一連串的拜金指控，她可以不慍不火反擊。
早前林峯帶她到美國出席胞弟的畢業禮，二人情到濃時當眾咀咀。看林峯表情，就知千語BB令他回到puppy love一樣。
從美返港，二人同挽Hermes情侶袋，吳千語因此被指拜金。
情人節禮物與林峯拍拖，吳千語直言是件很甜蜜、開心的事，可惜這段戀情由開始至今，一直跟「錢」掛鈎。
壹：傳聞話你一時要男友送Hermes，一時又話要佢送法拉利，仲要出埋錢租屋俾你同父母住！
吳：（一臉無奈，但語氣肯定）：一開始覺得好無奈，同佢（林峯）好似普通情侶咁交往，係去過旅行，我都想講番個袋（Hermes），其實係情人節禮物，收到時都好surprise，好鍾意，後來先知佢想大家用埋同款袋。
壹：咁你送番啲咩俾林峯呀？
吳：我送咗一系列嘅figure公仔俾佢，都貴㗎。
壹：咁法拉利呢？
吳：我車牌都未有，講送車就有啲過分，我屋企人好長時間唔喺香港，阿峯都未見過我爹哋媽咪，話要佢租屋俾我父母住唔係真嘅，佢其實唔識佢哋。
林峯與前度潘霜霜的家居合照中，發現figure迷的他真的有不少收藏。現任女友夠細心，收Hermes，送figure。
早前美國之行，林峯帶千語BB見家長，與林家一同共晉晚餐。
難得林峯肯將戀情浮面，給光環千語BB，但有傳惹來無綫高層樂易玲不滿，從不表態支持峯語戀。
買得起名牌吳千語堅稱林峯無送車無租屋俾自己，亦否認身上的名牌衫、鞋是男友所送。
壹：咁你行出嚟一身名牌，又係唔係林峯送㗎？
吳：呢個講法太牽強，由入行到而家都有呢啲裙、衫、鞋，係for可能有機會做嘢時著，雖然我收入唔係好多，但都足夠應付自己生活、使費，係我自己買嘅。
吳千語聲稱明白在娛樂圈有很多事都身不由己，面對外間傳聞，大多也只能一笑置之。
壹：成日俾人話你「拜金」，林峯有冇安慰你？
吳：我自己都係抱住開朗心情去面對呢啲輿論，事實只有自己最清楚，唔使好介意啲唔係事實嘅嘢，俾多啲時間等外界了解同認識我。阿峯又冇做過啲乜，大家都明呢個圈嘅運作，睇完就算，唔會成日提住。
做峯嫂預咗要面對攻擊。吳千語揚言不理閒言，同男友互相打氣。
千語BB同林峯相戀初期，提㩗她的老闆黃百鳴曾擔心她拍拖分心，影響工作。
上週六（一日）出席活動後吳千語與經理人到附近餐廳醫肚，記者上前要求訪問，起初千語婉拒，但最後多番追問下，才為指控訴寃。
未有計劃結婚「峯語戀」的支持一半一半，甚至有傳聞指無綫有高層不贊成二人拍拖。
壹：無綫入面係唔係有反對你哋兩個咁高調？
吳：（眉頭一皺）唔……一定有唔鍾意我或者佢嘅人，唔想我哋一齊，喺呢行有好多唔同嘅意見，最緊要係我哋個心一致。我又冇聽過，亦控制唔到人哋鍾唔鍾意我，希望大家俾多啲空間大家去拍拖。其實最初我公司都有擔心我哋拍拖會影響做嘢，但我哋已經證明咗冇因為拍拖分心，而家公司都唔反對。
壹：有傳樂易玲唔鍾意你？
吳：我就覺得有啲奇怪，見過兩次面食過飯，相處溝通好好，唔知點解會咁講。
壹：你哋有結婚計劃？
吳：我諗每個女仔都想結婚，由細到大我都想有個幸福、完整嘅家庭，但我哋仲喺好淺嘅階段，時間或工作上都仲有好多發揮嘅空間，我只可以講，我哋感情好穩定，但未去到有結婚計劃呢樣嘢。
嚟緊要拍套動作片，有打戲，要花好多時間去練肌肉，做gym同食多啲嘢，唔好俾人見到好似厭食咁瘦。我都希望有自己嘅事業，唔係淨係得緋聞；亦希望我同阿峯互相鼓勵，做嘢時可以更加努力，希望大家俾多啲祝福同空間我哋！
去年勁歌總選，攞獎的林峯首次公開多謝BB（女友暱稱），從此吳千語變為千語BB。
今年初捧男友個唱的吳千語，拿着Celine手袋。她澄清身上的名牌衫及手袋，大部分是自己買。而當時二人關係尚未公開，但她已可在後台出入，顯盡女友地位。
