HotCha Regen張惠雅，放逐期滿殺入TVB

HotCha Regen　放逐期滿殺入TVB女子組合HotCha入面嘅Regen（張惠雅），年半前懷疑介入Neway大少薛世恆同老闆娘陳法拉做小三，之後被放逐到澳洲。依家件事丟淡咗，雪藏期終於屆滿。

就嚟25歲嘅Regen，呢排先入無綫拍新劇《貓屎媽媽》做學生妹，又去studio錄歌仔。經理人仲話佢依家獨立發展先，遲吓會出單曲㖭。咦，停工年半，一返嚟就咁多嘢做，睇嚟老闆娘已經火氣全消喎！媽咪姐問佢仲敢唔敢單獨同大少出街食飯時，Regen即刻話：「唔喇！都係避忌啲好，的確仲係有陰影，但返嚟都預咗會俾人再寫。唔驚得咁多！抑鬱症都好番無事。現時我都係努力工作好啲！」家陣無綫小生花旦青黃不接，就連𡃁妹李綺雯都話唔再續經理人約時，Regen呢個新晉「𡃁妹」長做長有啦。

無綫新劇《貓屎媽媽》，Regen喺劇入面演香香公主岑麗香個妹，25歲仲扮到中學生，呢啲咪堅童顏囉！

Regen經歷過被懷疑小三，後患有輕度抑鬱。去到澳洲落田做農夫，仲試過做侍應搵生活費。今日終於如願返港入studio唱歌做番歌手，仲有過千人like佢喎。